Mashambulizi ya kigaidi ya Brussels

Mashambulizi yaliyotokea jana katika mji mkuu wa Ubelgiji, Brussels yameendelea kuakisiwa na kulaaniwa sana katika vyombo vya habari na duru za kimataifa.

Baada tu ya mashambulizi hayo yaliyolenga uwanja wa ndege wa Zaventem mjini Brussels na kituo cha treni ya chini kwa chini, Baraza la Usalama wa Taifa la Ubelgiji lilikutana na kujadili kadhia hiyo. Takwimu zinasema kuwa, hadi sasa watu wasiopungua 34 wameuawa katika mashambulizi hayo na wengine zaidi ya 190 kujeruhiwa. Kundi la kigaidi la Daesh limetangaza kuwa limehusika na mashambulizi hayo.

Mashambulizi ya kigaidi yaliyotokea jana mjini Brussels yanafuatia yale yaliyotokea Paris, Ufaransa miezi ya Januari na Novemba mwaka jana. Mashambulizi hayo kwa mara nyingine tena yamepiga kengele ya hatari kwa viongozi wa masuala ya kisiasa na kiusalama juu ya tishio kubwa la makundi ya kigaidi na kitakfiri barani Ulaya.

Siku kadhaa zilizopita askari usalama wa Ubelgiji walimtia nguvuni Salah Abdulsalam ambaye inasemekana ni miongoni mwa wanapangaji wakuu wa mashambulizi ya mwaka jana mjini Paris. Hata hivyo mshirika wa gaidi huyo alitoroka; kwa msingi huo polisi ya Ubelgiji ilitahadharisha juu ya uwezekano wa kutokea mashambulizi ya kigaidi. 

Maafisa wa polisi ya Ubelgiji wanasema Abdulsalam alikuwa na mpango wa kutekeleza mashambulizi kadhaa ya kigaidi katika jiji la Brussels.

Mashambulizi ya jana nchini Ubelgiji yamezilazimisha nchi nyingine za Ulaya kupandisha juu daraja ya tahadhari ya usalama. Mashambulizi hayo ya kigaidi ambayo tunaweza kusema taathira zake kwa nchi ndogo ya Ubelgiji ni sawa na za tukio la Septemba 11 mwaka 2001 nchini Marekani, yatapelekea kufanyika mabadiliko makubwa katika muundo wa vyombo vya upelelezi na usalama nchini humo na kuziathiri nchi nyingine za Ulaya. 

Baada ya mashambulizi ya Paris mawaziri wa mambo ya ndani wa Ulaya walikutana mara kadhaa kupanga mikakati mipya ya kuzidisha usimamizi katika mipaka na raia wa nchi hizo. Lengo na mikutano hiyo ni kupunguza vitisho vya ugaidi hususan kutoka kwa raia wa nchi za Ulaya waliojiunga na makundi ya kigaidi ya kitakfiri katika nchi za Syria na Iraq na baada ya kurejea katika nchi zao sasa wanatekeleza mashambulizi ya mara kwa mara ya kigaidi. Pamoja na hayo inaonekana kuwa, hatua zilizochukuliwa na mawaziri wa mambo ya ndani wa nchi za Ulaya hazikutosha na magaidi hao wameendelea kutekeleza mashambulizi barani Ulaya.

Maafisa wa masuala ya usalama barani Ulaya wanasema, zaidi ya raia elfu tano wa nchi hizo wamejiunga na makundi ya kigaidi yanayopigana katika nchi za Iraq na Syria na baadhi yao tayari wamerejea katika nchi zao. Kurejea kwa magaidi hao ambao wengi wao bado ni wanachama wa makundi ya kigaidi kama lile la Daesh, kumefuatiwa na mashambulizi kadhaa makubwa ya kigadi barani Ulaya likiwemo lile la tarehe 13 Novemba lililofanywa na wanachama wa kundi la Daesh ambalo liliua watu zaidi ya 130.

Wakati huo huo Polisi ya Ulaya (Europol) ilisema hapo awali kuwa tathmini ya mazungumzo ya maafisa wa usalama wa bara hilo inaonesha kwamba, kuna uwezekano mkubwa wa kutokea mashambulizi ya kigaidi wakati wowote ule katika nchi za bara hilo.

Pamoja na hayo yote hatupasi kusahau kwamba, watu wa Ulaya sasa wanavuna matunda ya mche walioupandikiza wenyewe huko Syria kwa kuyaunga mkono na kuyafadhili makundi ya kigaidi kama Daesh dhidi ya serikali halali ya Bashar Assad.

Baada ya mashambulizi ya Brussels inatazamiwa kuwa kutafanyika mabadiliko makubwa si katika taasisi na mikataba ya Ulaya pekee kama ule wa Schengen bali pia mazingira na masuala ya kijamii na mitandao ya intaneti itatawaliwa zaidi na anga ya kipolisi na kiusalama katika nchi za bara la Ulaya. (BARAKA NYAGENDA)

Nguesso ashinda uchaguzi wa rais Congo Brazaville

Matokeo ya awali ya uchaguzi wa rais huko Jamhuri ya Congo Brazaville yanaonyesha kuwa Rais Denis Sassou Nguesso anaongoza kwa wingi wa kura.

Mwenyekiti wa Tume ya Uchaguzi nchini humo Henri Bouka, amesema Rais Sassou Nguesso anaongoza kwa asilimia 67 ya kura zote halali zilizopigwa katika uchaguzi uliofanyika Jumapili. Hata hivyo wagombea watano wa kiti cha rais wamesema hawatambui matokeo hayo.

Itakumbukwa kuwa, serikali ya Congo Brazzavile iliyaagiza mashirika mawili makubwa ya simu nchini humo ya MTN Congo na Airtel Congo kukata mawasiliano yote ya simu wakati wa kufanyika zoezi la uchaguzi wa Rais. Aidha serikali ilisitisha huduma za intaneti katika kipindi hicho.

Waziri wa Mambo ya Ndani wa Congo Brazzavile aliziambia duru za habari kwamba, uamuzi huo wa kukatwa mawasiliano ya simu na intaneti umechukuliwa kutokana na sababu za kiusalama.

Rais Nguesso ambaye ameingoza nchi hiyo kwa zaidi ya miaka 30, Oktoba mwaka jana alibadilisha katiba na kuondoa kipengee kinachoweka ukomo wa vipindi viwili kwa Rais na kujiandalia mazingira ya kubakia madarakani. (BARAKA NYAGENDA)

Tigo yatoa 300m/- kudhamini wanafunzi wa tehama vyuo vikuu

Meneja mkuu wa Tigo, Diego Gutierrez akiongea na waandishi wa habari(hawapo pichani)wakati wa kutangaza udhamini wa kampuni hiyo kwa wanafunzi tisa wanaochukua mafunzo ya Tehama katika vyuo vikuu vya hapa wa jumla ya shilingi million 300 mapema leo  jijini Dar Es Salaam. Kulia ni Mkurugenzi mkuu wa DTBi, Mhandisi George Mulamula na kushoto ni Meneja wa huduma za Jamii Tigo, Woinde Shisael.

Mkurugenzi mkuu wa DTBi, Mhandisi George Mulamula akiongea na waandishi wa habari(hawapo pichani) katikati ni Meneja mkuu wa Tigo, Diego Gutierrez,na kushoto ni Meneja wa huduma za Jamii Tigo, Woinde Shisael. wakati wa kutangaza udhamini wa kampuni hiyo kwa wanafunzi tisa wanaochukua mafunzo ya Tehama katika vyuo vikuu vya hapa wa jumla ya shilingi million 300 mapema leo  jijini Dar Es Salaam.

Meneja mkuu wa Tigo, Diego Gutierrez  akipeana mkono na Mmoja wa wanafunzi waliopata udhamini wa tigo  Carolyne Paul, mwanafunzi wa mwaka wa kwanza Udsm shahada ya uhandisi wa kompyuta na teknolojia ya habari   wakati wa kutangaza udhamini wa kampuni hiyo kwa wanafunzi tisa wanaochukua mafunzo ya Tehama katika vyuo vikuu vya hapa wa jumla ya shilingi million 300 mapema leo  jijini Dar Es Salaam.

Meneja mkuu wa Tigo, Diego Gutierrez(katikati),Mkurugenzi mkuu wa DTBi, Mhandisi George Mulamula(kulia) na Meneja wa huduma za Jamii Tigo, Woinde Shisael(kushoto) wakiwa kwenye picha ya pamoja na wanafunzi wa vyuo mbalimbali wanaochukua mafunzo ya Tehama mara baada ya kampuni ya Tigo kutangaza udhamini wa jumla ya shilingi million 300 kwa wanachuo hao   mapema leo katika ofisi za makao makuu ya Tigo Kijitonyama jijini Dar Es Salaam.

Meneja mkuu wa Tigo, Diego Gutierrez(katikati) akipata "SELFIE"  na ,Mkurugenzi mkuu wa DTBi, Mhandisi George Mulamula  na Meneja wa huduma za Jamii Tigo, Woinde Shisael pamoja na wanafunzi wa vyuo mbalimbali wanaochukua mafunzo ya Tehama mara baada ya kampuni ya Tigo kutangaza udhamini wa jumla ya shilingi million 300 kwa wanachuo hao   mapema leo katika ofisi za makao makuu ya Tigo Kijitonyama jijini Dar Es Salaam   .

Dar es Salaam Machi 23, 2016 Tigo Tanzania kwa kushirikiana na Dar Teknohama Business Incubator (DTBi) leo wametangaza kudhamini wanafunzi tisa wanaochukua mafunzo ya Tehama katika vyuo vikuu vya hapa kwa jumla ya shilingi million 310.

Akitangaza udhamini huo jijini Dar es Salaam, Meneja Mkuu wa Tigo Diego Gutierrez amesema fedha hizo zitagharamia ada ya chuo, gharama za kufanya utafiti, malazi na chakula kwa kipindi cha miaka minne cha masomo ya Tehama kwa kila mwanafunzi.

Gutierrez amesema udhamini huo unaowalenga kuwasiadia vijana wenye vipaji katika taaluma ya Tehama kutimiza ndoto zao za kimaisha ni sehemu ya sera ya kampuni hiyo ya mawasiliano ya kuunga mkono jitihada mbalimbali za kukuza sekta ya tehama na kuleta maendeleo nchini.

“Tunaamini kupitia udhamini huu kampuni yetu,  kwa kushirikiana na DTBi, inatoa mchango wake katika kujenga kizazi kijacho cha mabingwa katika sekta ya Tehama ambao watakuwa nguzo muhimu katika kukuza uchumi wa nchi hii,”Gutierrez amesema akiongeza kwamba tayari kuna makubaliano kati ya Tigo na DTBi unaowapa wanafunzi kutoka DTBi fursa ya kubuni bidhaa mbalimbali vya Tehama ambavyo hutumiwa na Tigo kibiashara na mapato kugawanywa kwa wadau wote.  

 Wanafunzi tisa waliobahatika kupata udhamini wa Tigo ni Erickson Muyungi (UDSM), Fatma Moshi (UDSM), Caroline Paul (UDSM), Michael Lunyungu (UDOM), Robert Charles (UDOM), Isack Kipako (UDOM), Jacqueline Dismas (UDSM), Jumanne R. Mtambalike (IFM) na Joel Mtebe (UDSM).

Akizingumzia zaidi kuhusu mkataba huo kati ya Tigo na DTBi, Mkurugenzi huyo wa Tigo amesema: “mbali na udhamini tunaoutoa kwa wanafunzi wa Tehama tuna mradi wa pamoja uitwao ‘Project Digitize’ ambao umewawezesha wanaTehama chipukizi kuanzisha kampuni zao kuipitia ubunifu wao na ambao wanapata msaada kutoka Tigo katika kuendeleza miradi yao. Hadi leo kuna wanatehama watatu wanaosaidiwa na Tigo kupitia mpango na ambao bidhaa pindi bidhaa zao zitakapoanza kutumika kibiashara, watafaidika kutokana na mgawanyo wa mapato..”

 Naye Mkurugenzi Mtendaji wa DTBi Mhandisi George Mulamula kwa upande wake amesema üshirikiano na Tigo umetoa fursa na njia za kibunifu kwa wanafunzi wa DTBi kupata elimu, kujenga uwezo wao wa Tehama ambavyo vitawasaidia kuonyesha vipaji vyao katika fani hii ndani na nje ya nchi.”

Mulamula aliongeza kusema kwamba: “DTBi’s ina malengo ya kuwahamasisha vijana wakiwemo wanawake kujenga tabia za kuwa wajasiriamali Tehama ili kusaidia kukuza sekta binafsi na kuongeza makusanyo ya kodi nchini. Katika kutekeleza azma hii, Tigo imetoa mchango mkubwa kwa kuwawezesha wajasiriamali wetu kufikia ndoto zao za uzalishaji mali, kusaidia kutatua changamoto mbalimbali katika jamii, kuleta nafasi mpya za ajira yote haya yakiwa ni vielelezo vya jinsi ambavyo tehama inaweza kusaidia kukuza pato la taifa.”