WAFANYABIASHARA SOKO KUU LUDEWA WAMETELEKEZWA VYOO VICHAFU, HAVINA MAJI SOKO HALINA ULINZI.

Wengi sasa wafanyia biashara mtaani na majumbani.
WAKATI Halmashauri ya Wilaya ya Ludewa ikilalamikia ufinyu wa Bajeti na kushindwa kutekeleza miradi ya maendeleo na huduma muhimu za jamii kwa kukosa raslimali fedha, wafanyabiashara katika soko kuu la mjini hapa wamelikimbia soko na kuamua kufanyia majumbani bila kulipa ushuru kutokana na soko hilo kukosa huduma muhimu za kiutu kama vile choo safi, maji na mlinzi.
Wakizungumza katika soko jipya wafanyabiashara wa mbogamboga, nyanya, vitunguu na matunda walisema wanalazimika kukimbilia majumbani kwao hata kama ni mbali kwa ajili ya kwenda kujisaidia kutoka na soko hilo kuwa na vyoo vichafu vya zamani huku soko jipya nalo likikosa maji wakati vyoo ni vya kuflashi.
”Ndugu mwandishi hebu angalia na uingie wewe mwenyewe ndani ya vyoo hivyo kama unaweza kujisaidia na kuvumilia hali ya uchafu kila siku tunalazimika kwenda majumbani kujisaidia na kisha kurudi kuendelea na biashara.ni hatari sana inasikitisha,” alisema mmoja wa wafanyabiashara kwa masharti ya kutotajwa jina kuhofu kufuatiliwa.
Kwa upande wake Bi Jovita Haule na Neema Haule walisema ni kutokana na adha zilizopo katika soko hilo sasa hivi wafanyabiashara wengi wameondoka na kwenda kufanyia biashara majumbani na kuwafuata wateja waliko mitaani ambako kulipa ushuru ni nadra tofauti na sokoni ambako wanatozwa ushuru hata kama hawajauza.
Bi Auleria Mtitu (mama Grady) aliulaumu uongozi wa kiji na Kata wao ndiyo chanzo cha kuikosesha Halmashauri mapato kwa sababu wameshindwa kulisimamia soko kukidhi haja na kuruhusu watu kufanya biashara mitaani na majumbani ambako siyo rahisi kufuatilia ushuru ukuzingatia kwa sasa wengi wanalima mboga.
Mama Grady na wenzake walisema kuwa hakuna haja ya kulima mboga kama hali itaendelea kuwa kama ilivyo na kuongeza kuwa wakati umefika sasa wa viongozi wenye mamlaka kuwakusanya wafanyabiashara walioko mitaani na majumbani kuja sokoni ili kuleta ushindani wa kweli.””sisi tunalipa ushuru kila siku lakini wenzetu hawalipi mitaani hakuna usawa angalia mwandishi soko liko wazi halina watu kabisa walilalamika wafanyabiashara hao””.
Afisa Mtendaji Kata ya Ludewa Bw Onesmo Haule kwa upande wake alikiri kuwepo kwa wafanyabiashara kuzagaa mitaani na kusema kuwa watu wote wanatakiwa kuleta bidhaa zao sokoni, lakini akajitetea kuwa soko limejaa hakuna nafasi jambo ambalo lilipingwa vikali na wachuuzi hao kwa sababu soko liko wazi sasa limejaa watu wasioonekana? Waliuliza wachuuzi hao
Kuhusu ulinzi wa soko Bw Haule alisema hilo siyo jukumu la Halmashauri bali ni wajibu wa wafanyabiashara wenyewe kutafuta mlinzi wa kulinda mali zao na kwamba utaratibu huo walishakubaliana katika vikao vilivyopita chini ya uongozi wa soko hilo.
Mwenyekiti wa wafanyabiashara sokoni hapo mzee Masopola kwa upande wake alisema kwa upande wa vyoo hiyo ni hadithi ya muda mrefu sana na viongozi wamekuwa wakiahidi kila wanapoomba kura lakini hakuna kinachoendelea na wala hawatembelei kuona hali ilivyo.
Masopola alisema vyoo vilivyopo vimechoka mpaka vimechakaa na sasa vimezungushwa na mabati machakavu na kuongeza viongozi wamalazimisha watu kuingia katika soko jipya lakini huduma za msingi kama maji, vyoo na mlinzi hakuna hivyo watu wanalazimika kujitwisha mizigo kila siku kuleta sokoni na kurudisha na kushauri kuwa kama kuleta maji ni vigumu ni bora vichimbwe vyoo vya shimo.
”Mapungufu yapo pande zote kwa serikali na kwa wafanyabiashara hivyo kuna haja ya kukaa pamoja kuwaelimisha watu wajibu na haki zao lakini kwa upandewa serikali ijue wajibu zake na kuziweka bayana ama sivyo soko litabaki wazi kwa sababu mapungufu haya yalianza wakati wa kulikabidhi soko jipya hapakuwa na maandaliza wala utaratibu,”alisisitiza mzee masopola
                               

MALKIA WA MCHWA HUYU HAPA

 

Matola Suleiman mkazi wa Songea Mahenge katika Manispaa ya Songea mkoani Ruvuma akiwa ameshika malkia wa mchwa mkononi kutoka kwenye shimo alikojificha chini ya sakafu ya nyumba ya mkazi wa Peramiho leo. Sulemani ambaye ni mwenyeji wa Wilaya ya Tunduru mkoani Ruvuma alisema alianza kazi ya kutoa mchwa tangu 1980. Tatizo la mchwa ni kubwa katika Mkoa wa Ruvuma.

 

Shimo alimopatika Malkia wa mchwa ili hapa.

 

Malkia wa mchwa  jinsi anavyoonekana vizuri. Pembeni mwa malkia wa mchwa ni kadume ka malkia.

DC LUDEWA ACHANGISHA MILIONI 5 ZA UJENZI WA SHULE NA KUSEMA LUDEWA WAGUMU KUCHANGIA ELIMU WEPESI KWENYE SHEREHE.

MKAMATE elimu usimwache aende zake maana yeye ni uzima wako, na kama unadhani elimu ni gharama basi, jaribu ujinga. Hiyo ni kauli mbiu iliyotumika jana katika Harambee ya kuchangia ujenzi wa shule ya Sekondari ya Matakatifu Alois inayomilikiwa na Kanisa Katoliki Jimbo la Njombe, Parokia ya Ludewa.
Mkuu wa Wilaya ya Ludewa Bi. Georgina Bundala kama mgeni rasmi akiwakilishwa na Afisa Maaendeleo ya Jamii Wilaya Bw. Lazaro Mapunda aliongoza harambee hiyo iliyohudhuriwa na wadau na wananchi wachache lakini akafanikiwa kuchangisha jumla na zaidi ya shilingi 5m/- na kuungwa mkono na wageni kutoka makao makuu ya Jimbo Katoliki la Njombe.

Wananchi wilayani Ludewa wanatakiwa kushiriki na kuwekeza zaidi katika elimu ili kuongeza idadi ya wataalamu wilayani humo na Taifa kwa ujumla badala ya kupoteza muda na fedha nyingi kwenye vikao vya harusi na sherehe zingine zinazohusiana na mambo ya burudani,kuselebuka, kulakula na kunywa huku watoto wakiendelea kufanya vibaya katika mitihani yao.

Hayo yalisemwa na Mkuu wa Wilaya ya Ludewa Bi Georgina Bundala kwenye Ukumbi wa Kanisa Katoliki la Yesu Kristo Mkombozi Parokia ya Ludewa katika harambee maalumu ya kuchangia fedha kwa ajili ya ujenzi wa Sekondari ya Mtakatifu Alois inayomilikiwa na Kanisa Katoliki Mdonga nje kidogo ya Mji wa Ludewa.

Awali akitoa taarifa kwa mgeni rasmi, Paroko wa Parokia ya Ludewa Fr. Ladislaus Mgaya alisema kuanzishwa kwa shule za msingi na sekondari zinazomilikiwa na Kanisa Katoliki, Jimbo la Njombe kunatokana na tamko la Askofu wa Jimbo Alfred Maluma la mwaka 2003, lilinukuliwa kwenye Kitabu cha Mithali Sura  ya 22 aya ya sita inayosema (mlee mtoto katika njia ipasayo naye hataiacha hata akiwa mzee).

Fr. Ladislaus Mgaya alisema Elimu na Malezi bora. Huu ndio wimbo tutakao kuwa tunaimba na kugharamia elimu, tamko hili lilianza kutekelezwa mwaka 2004 na Ludewa likaanza kuzaa matunda mwaka 2007 ambapo majengo yalianza kujengwa kwa nguvu za waumini wenyewe.

Fr. Mgaya alizitaja Changamoto wanazokabiliana nazo kuwa ni pamoja na ujenzi wa maabara na nyumba tatu za walimu vyote vikiwa na thamani ya shilingi 50m/- na kwamba kwa sasa idadi ya wanafunzi shuleni hapo ni 98 wakiwemo wasichana 35 tu.

Naye Mkurugenzi wa elimu katika Jimbo Katoliki la Njombe, Fr. Bruno Henjewele aliwataka waumini na wananchi wote wa Ludewa kutofanya uzembe katika suala la elimu kwani badaye wanaweza kuja kupata majuto yenye maumivu makali kwani dunia ya leo bila elimu ni aibu kwa sababu hata vibarua wa kufagia atatakiwa kuwa na vyeti vya sekondari.

Wageni waliomwakilisha Baba Askofu katika Harambee hiyo ni pamoja na Fr Alexanda Mlelwa ambaye ni Paroko wa Parokia ya Makete na Mwenyekiti wa Mapadre wazawa Jimbo la Njombe, Fr Bruno Henjewele Mkurugenzi wa Elimu Jimbo, Mkuu wa Shule ya Msingi SICRED waliochangia shilingi laki tano, Shule ya Msingi Bakita waliochangia laki mbili na nusu.

Wengine Mkuu wa Shule ya Sekondri ya Ilowola waliochngia shilingi laki nne, Masista wa shule ya Mtakatifu Monica Seminari ya wasichana walichangia shilingi laki mbili, Shule ya Sekondari wavulana (Umawanjo) inayotegemea kujengwa Upangwa Bonde la Ludewa Lugarawa chini ya umoja wa mapadre nayo ilitoa shilingi laki moja sitini elfu taslimu.

Jimbo Katoliki la Njombe hadi sasa limefanikiwa kujenga shule nyingi zikiwemo za msingi na sekondari.

Mji wa Ludewa Pamoja na kuwa na makanisa Lukuki yanayoibukia kila kukicha kwa kuhubiri neno la Mungu ni Kanisa moja tu la Kianglikana ndilo lililoshiriki vyema harambee hiyo kwa moyo na kuchangia shilingi laki moja chini ya Mchungaji wake Padre Mtweve ambaye kwa upande wake aliwasihi wachungaji wenzake, na wananchi kwa ujumla kuwa waache kushiriki kwenye mialiko yenye kula waache tofauti za imani na kushiriki katika mambo ya msingi kama elimu kwani hata maandiko matakatifu yanaelekeza hivyo.

Elimu ni Sarakasi na kujenga shule moja ni sawa na kujenga makanisa mengi.Hiyo ilikuwa  kauli ya Mwenyekiti wa Halmashauri ya walei Parokia ya Ludewa Bw. Linus Njalla Ngalomba alipokuwa akihitimisha harambee hiyo kwa kuwashukuru wale wote waliofanikisha zoezi hilo sambamba na wageini kutoka Jimboni Njombe.