KUUAWA KWA POLISI BENKI YA CRDB MBANDE JIJINI DAR ES SALAAM JESHI LA POLISI LAHUSISHA NA UKUTA

Kamishna Operesheni na Mafunzo wa Jeshi la Polisi nchini, Nsato Marijan Mssanzya (CP), akizungumza na waandishi wa habari Dar es Salaam leo kuhusu tukio la mauaji ya askari wanne katika Benki ya CRDB Tawi la Mbande yaliyotokea usiku wa kuamkia leo.

Waandishi wa habari wakichukua taarifa hiyo.

Wapiga picha na waandishi wakiwa bize kupata taarifa hiyo.

Na Dotto Mwaibale

KUFUATIA mauaji ya askari wanne yaliyotokea Kata ya Mbande Temeke kwa watu wanaodhaniwa ni majambazi kuvamia benki ya CRDB na kuwaua askari hao kwa kutumia silaha za moto jeshi la Polisi limetangaza kiama na kuwataka wahusika wote kujisalimisha.

Katika hatua nyingine jeshi la polisi limehusisha tukio hilo na Umoja wa Kupinga Udikteta Tanzania (UKUTA) kufuatia matamko ya baadhi ya viongozi wa kisiasa ambao wamesikika katika majukwaa ya kisiasa wakihamasisha wafuasi wao wawashambulie askari wa Jeshi la Polisi.

Kauli hiyo imetolewa na Kamishna Operesheni na Mafunzo wa Jeshi la Polisi nchini, Nsato Marijan Mssanzya (CP), wakati akizungumza waandishi wa habari Dar es Salaam leo mchana ambapo pia alikiri kuwa mazoezi yanayofanywa na polisi yamelenga kukabiliana na Ukuta.

Akizungumza kwa hisia CP Mssanzya pia alipiga mikutano ya ndani yenye viashiria vya uchochezi na hata ikifanyika kwenye majukwaa watamshusha muhusika na kumfikisha kwenye mkono wa sheria.

Aidha CP Mssanzya aliwataja askari waliouawa katika tukio hilo wakati wakibadilishana lindo kuwa ni E.5761 CPL Yahya, F.4660 CPL Hatibu, G 9524 PC Tito na G 9996 PC Gastoni na raia wawili waliojeruhiwa aliowataja kuwa Ali Chiponda na Azizi Yahya wote wakiwa wakazi wa Mbande.

"Katika tukio hilo majambazi ambao idadi yao haikufahamika walifanikiwa kupora silaha mbili aina ya MSG na risasi 60 na hakuna pesa wala mali ya benki hiyo kuibiwa au kuharibiwa, ni dhahiri kuwa waharifu hao walikuwa na kusudio moja tu la kuwashambiulia askari polisi, " alisema.

Alisema katika hali ya kushangaza baada ya tukio hilo kuna baadhi ya watu waliandika mitandaoni kubeza na kukeji mazoezi ya kawaida ya jeshi la polisi na wengine waliandika ujembe wa kushabikia tukio hilo la kuuawa kwa askari polisi huku wengine wakidiriki kuandika ujumbe unaosema endapo watapigwa na polisi Srptemba1 mwaka huu basi viongozi wa jeshi hilo wawaondoe askari wanaoishi uraiani na kuwarudisha kambini.

Aliongeza kuwa jeshi la polisi limejipanga vema kukabiliana na matukio yote ya uvunjifu wa amani nchini.

MCHUNGAJI RAPHAEL MWASIFIGA: HAIKUWA KAZI RAHISHI KUMJUA MUNGU

KANISA LA BAPTIST SINDE 

Na Friday Simbaya, Mbeya

“Nilizaliwa katika familia ya kipagani ambapo baba yangu mzazi alikuwa ni msaidizi wa chifu ambao waliitwa ‘Ifumu’, habari za dini na elimu kwake zilikuwa ni mwiko…”

Hayo yalikuwa ni maneno ya Mchungaji Raphael Mwasifiga wa Kanisa la Baptist la Kanani, Makunguru Sinde, Mwanjelwa mkoani Mbeya.

Mchungaji Mwasifiga alizaliwa mwaka 1953 katika kijiji cha Lukule Kiwira akiwa ni mtoto wa saba na wa mwisho katika familia ya Mzee Mwasifiga.

Alisema kuwa alipenda sana kusoma shule na kujifunza dini lakini haikuwa kazi rahisi kutokana na baba yake kuona vitu kama hivyo ni vya kihuni.

“Wakati ni kiwa mtoto nimechunga sana ng’ombe kijijini kwetu na baadaye niliamua kwenda shule na nilisoma mpaka darasa la saba mwaka 1968,” alisema Mch. Mwasifiga.

Alisema kuwa baada ya kumaliza elimu ya msingi alikwenda kuishi na dada yake mjini Mbeya ndipo alipoanza kujishughulisha na masuala ya dini na baadaye kumpokea Bwana Yesu.

Alisema kuwa kabla hajaja mjini Mbeya kuishi na dada yake, aliwahi kushiriki mkutano mkubwa wa injili uliondaliwa na kanisa la KKKT huko Masebe Tukuyu, Mwakaleli ambao ulifanyika kwa siku nne na ndipo aliposhukiwa na roho mtakatifu na kujikuta akiwa muinjilisti.

Alisema kuwa wazazi wake waliposikia ameokoka kitendo kicho kuliwachukiza sana.

Baba yake alikuwa anaona masuala ya dini na elimu kwake kama ni usanii ndio maana hakuona haja ya kuwapeleka watoto shuleni, alisema.

Baada ya kuona kuwa baba yake hakuwa na mpango wakuwapeleka shule ndipo alipoamua kwenda shule mwenyewe.

Mchungaji Mwasifiga alisoma katika Shule ya misheni ya Igogwe katika ‘Bush school’ hadi darasa la saba huko wilayani Rungwe Tukuyu, mkoani Mbeya.

Alisema kuwa baada ya baba yake kufariki mnamo mwaka 1964 alikuja kuishi mjini Mbeya kwa dada yake Mbeya maeneo ya Majengo.

Alisema kuwa katika watoto saba yeye pekee ndiye aliyesoma lakini dada zake wote hawakuwahi kuhudhuria hata darasa moja.

Alisema alipofika mjini Mbeya alipenda sana kwenda kanisani ndipo alipogundua kipaji chake cha uchungaji kupitia kwa Mchungaji mmoja Mwansodobe wa Kanisa la Baptist Majengo, ambapo akampokea Bwana Yesu na hatimaye kubatizwa kwa maji mengi.

Alisema alienda kusoma katika Chuo cha biblia tukuyu ambalo ni tawi la Arusha Bible College kwa miaka minne na nusu.

Alisema kuwa baada ya kumpokea Yesu aliamua kuwa muinjilisiti wa kujitolea kwa kuhubiri neno la Mungu nyumba kwa nyumba.

Alisema alikuwa anatembea kwa miguu kutangaza injili ya Yesu katika maeneo mbalimbali kutoka Uyole mpaka Mwakaleli katika miaka 1970 na 1972.

Alisema alifanyakazi ya kuhubiri na baadaye akaanza kutafutakazi kwa ajili ya kuoa.

Mnamo mwaka 1970 aliacha kazi pale Chuo cha Kilimo Uyole mjini Mbeya ambapo ni kuwa kama mtunza stoo (storekeeper) wakati huo chuo hicho kilikuwa na wazungu wawili na jengo moja tu, na kazi yake ilikuwa ya kutunza maziwa, mayai na kuuza kabeji.

“Nilikuwa nimeajiliwa sehemu mbalimbali kama vile kampuni ya Simu na kampuni mmoja ya kichina iliokuwa inajenga reli ya TAZARA na shirika la umeme la TANESCO,” aliongeza.

Alisema kuwa baada ya kufanyakazi kwa muda mrefu aliamua kuoa mke anaitwaye Kisa Mwasifiga. 

Mwaka 1979 nilienda Chuo cha Biblia cha Tukuyu kwa miaka minne baada ya kumaliza chuo aliendelea na uinjilishaji kuwa kuhubiri mitaani, alisema.

Alisema kuwa baada ya kufanya kazi ya Mungu mitaani aliamua kwenda kuomba darasa katika Shule ya Msingi Sinde na Rais Mwinyi alipoingia madarani alipiga marufuku watu kutumia majengo ya shule kuhubiria neno la Mungu.

Alisema kuwa baada ya kufukuzwa pale shuleni ndipo alipoamua kuanzisha kanisa lake akiwa na waumini wanane tu lakini leo kanisa linafurika.

Mchungaji Mwasifiga alisema alinunua viploti viwili kwa shilingi elfu 33 wakati huo kutoka kwa wenyeji kwa ajili ya kujenga kanisa mwaka 1992.

Alisema kabla ya kuanzisha kanisa alikodi lipagale moja ambalo walitumia kama kanisa kwa takribani miezi sita huku akiendelea na ujenzi wa kanisa.

Alisema kuwa walianza kujenga kanisa mwaka 1992 na familia yake kwa kushirikiana na waumini wachache waliokuwepo.

“Tulipo eneo la kujenga kanisa tuanaza mara moja kufyatua matofali na kuanza ujenzi mara moja huku nikipiga mikutano ya nguvu katika eneo la kanisa…” aliongeza Mchungaji Mwasifiga.

Alisema kuwa katika waumini wale na walikuwepo mafundi ujenzi wawili ambao walikuwa wanasaidiana nao kujenga ambapo mafunzi wakiinua kuta wao kazi yao ilikuwa kukazia.

Alisema kuwa walipomaliza kujenga kanisa hilo katika maeneo ya Makunguru Sinde, Mwanjelwa alitokea mzungu mmoja aitwaye Rafubo akawasaidia vigae kwa ajili ya kuezeka kanizsa lakini kwa bahati mbaya vigae vile vilikuwa vibovu vilianza kudondoka.

Alisema kuwa baada ya kuona kuwa vigae vile ni vibovu waliamua kuezeka kwa bati na mpaka sasa kanisa hilo linaendelea kupanuliwa na wanampango wa kujenga ghorofa moja ili waumini wasikae nje wakati wa kusali.

Alisema kuwa Kanisa la Kanani limepitia katika hatua mbalimbali za ujenzi na kwa sasa wameanza kulipanua ilikujenga ghorofa moja na wamenunua pia vyombo vya muziki kwa ajili ya kumtukuza Mungu.

Alisema wakati anafanya kazi ya Mungu alitokea Mchungaji Mpeli Mwaisumbe wa Kanisa la Daily Bread life Ministry lililopo mjini Iringa mkoani Iringa. 

Alisema kuwa Mchungaji Mpeli alikuwa ametoka kusoma masuala ya kichungaji na kupewa kanisa moja pale Mabatini mjini Mbeya kabla ya kuhamia Iringa ambapo sasa ana kanisa lake la Daily Bread Life Ministry.

“Mchungaji Mpelia lipotoka chuo hakuwa na uzoefu wakuhubiri neno la Mungu kwa hiyo aliamua kuungana na mimi katika Kanisa la Baptist ili kujifunza zaidi…,” alisema Mch. Mwasifiga.

Shirika la Daily Bread Life ambalo linaongozwa na Mchungaji Mpeli Mwasumbe lina kituo cha kulelea watoto yatima cha ‘Daily Bread Life Children's Home’ chenye watoto 40 kilichoanzishwa mwaka 2005 kupitia Daily Bread Life Ministries.

Aidha, Mchungaji Mwasifiga alisema kuwa amefundisha watumishi wengi na wengine wameamua kuanzisha makanisa yao wakitokea mikononi mwake.

Mchungaji Mwasifiga amekua mchungaji katika Jumuiya ya Wabaptist Mbeya nakushika nyazifu mbalimbali za uongozi na kwa sasa ni mdhamini mkuu wa ‘Baptist Convention of Tanzania-BCT.’

Mchungaji Mwasifiga amekuwa mchungaji kwa zaidi ya miaka 34 na kwa sasa ameamua kustaafu kwa hiari na atabakia kuwa mshauriwa wa Kanisa la Baptist la Kanani Mbeya, Makunguru Sinde maeneo ya Mwanjelwa.

Alisema kuwa kanisa lake limefanyikiwa kusomesha wachungaji wanne ambao ni mchungaji Mwapongo ambaye ni mkuu wajimbo la Baptist Mbeya, Mwalusamba, Mwambona na Kawema na wengine ni wasichana walioinuka kuwa wachungaji.

Alisema kuwa kutokana afya yake kutokuwa nzuri ameamua kupumzika ambapo tarehe 28.08.2016 ndio tarehe yake maalum ya kustaafu.

Alisema kuwa haikuwa kazi rahisi kwake hadi kufikia hapo alipo kwani, alipitia katika changamoto nyingi ikiwemo kuugua magonjwa ya ajabu na pengine kulala nje kwa sababu yakukosa mahali pakulala wakati akifanya kazi ya Mungu.

KOREA KUSINI YATOA BILIONI NNE KUJENGA KITUO CHA TAARIFA KATIKA HIFADHI YA TAIFA YA SERENGETI

Wajumbe wa Kamati ya Maendeleo kwa Afrika katika Bnge la Korea Kusini wakiwasili katika uwanja mdogo wa ndege uliopo katika Hifadhi ya Taifa ya Serengeti. 

Meneja Masoko wa Shirika la Hifadhi za Taifa,TANAPA,Victor Ketance akipokea ugeni wa wajumbe kutoka Bunge la Korea Kusini walipotembelea Hifadhi ya Taifa ya Serengeti kwa ajili ya kutizama eneo la uwekezaji wa kituo cha kisasa cha taarifa za hifadhi hiyo.

Mkuu wa Hifadhi ya Taifa ya Serengeti (SENAPA) William Mwakilema akipokea ugeni wa wajumbe kutoka Bunge la Korea Kusini walipotembelea Hifadhi ya Taifa ya Serengeti kwa ajili ya kutizama eneo la uwekezaji wa kituo cha kisasa cha taarifa za hifadhi hiyo. 

Mkuu wa Hifadhi ya Taifa ya Serengeti (SENAPA) William Mwakilema akisalimiana na wadau wa utalii,Zainabu Ansel ,Mkurugenzi wa kampuni ya Utalii ya Zara(katikati) na Mkurugenzi wa Kibo Safari's Willy Chamburo.(kushoto) waliokuwepo uwanjani hapo. 

Mkurugenzi wa Kampuni ya Kibo Safari's ,Willy Chamburo (katikati) akizungumza jambo na kiongozi wa ugeni wa Korea Kusini Won Yul Chui (kushoto) baada ya kukutana katika uwanja mdogo wa ndege uliopo Hifadhi ya Taifa ya Serengeti .kulia ni Mhifadhi Mkuu wa Hifadhi ya Taifa ya Serengeti William Mwakilema. 

Wajumbe wa Kamati ya Maendeleo ya Afrika katika Bunge la Korea Kusini wakitia saini katika kitabu cha wageni mara baada ya kuwasili katika Hifadhi ya Taifa ya Serengeti kwa ajili ya kuangalia eneo lililotengwa kwa ajili ya ujenzi wa kituo cha kisasa cha taarifa za hifadhi hiyo.

Mhifadhi Mkuu wa Hifadhi ya Taifa ya Serengeti ,William Mwakilema (kushoto) akizungumza na Wajumbe wa kamati ya Maendeleoo ya Afrika ya Bunge la Korea Kusini waliofika katika Hifadhi hiyo kwa ajili ya ufuatiliaji wa maenedeleo ya kuanza kwa mradi wa ujenzi wa kituo cha kisasa cha Taarifa katika Hifadhi hiyo.

Mhifadhi Mkuu wa Hifadhi ya Taifa ya Serengeti,William Mwakilema akiongoza Ujumbe wa Wabunge wa Bunge la Korea Kusini walioko katika kamati ya Maendeleo ya Afrika kutembelea maeneo kutakapo jengwa kituo cha kisasa cha taarifa. 

Moja ya eneo lilipo sasa katika Hifadhi ya Taifa ya Serengeti ambayo inatumika kutoa taarifa kwa njia ya picha za video za Hifadhi hiyo. 

Ujumbe wa Wabunge wa Bunge la Korea Kusini wakitizama picha ya Hayati Baba wa Taifa ,Mwl Julius K. Nyerere akiwa na rafiki yake Prof,Dkt Bernhard Grzimek huku wakipata maelezo kutoka kwa Mhifadhi Mkuu wa Hifadhi ya Taifa ya Serengeti ,William Mwakilema.

Ujumbe wa Wabunge wa Bunge la Korea Kusini wakipata maelezo katika michoro ya kituo cha kisasa cha taarifa katika Hifadhi ya taifa ya Serengeti.

Mhifadhi Mkuu wa Hifadhi ya Taifa ya Serengeti ,William Mwakilema akitoa zawadi kwa wajumbe wa Bunge la Korea Kusini mara baada ya kutembelea eneo kutakapo jengwa kituo cha kisasa cha taarifa katika hifadhi hiyo. 

Wajumbe wa Bunge la Korea Kusini wakiwa katika picha ya pamoja na baadhi ya viongozi na watumishi wa Shirika la Hifadhhi za Taifa (TANAPA ) na Hifadhi ya Taifa ya Serengeti. 

Na Dixon Busagaga wa Michuzi blog Kanda ya Kaskazini.

Hifadhi ya Taifa ya Serengeti kwa kushirikiana na serikali ya Korea ya Kusini imeanza mchakato wa ujenzi wa kituo cha kimataifa cha kutunza tarifa za mienendo ya Wanyamapori kitakachojulikana kama Serengeti Internatinal Media Centre.

Kituo hicho kinachotarajiwa kugharimu zaidi shilingi bilioni nne kitajengwa katika Hifahi ya Taifa ya Serengeti .

Tayari serikali ya Korea Kusini imeshatuma wajumbe wake kuja nchini tanzania kujionea eneo kitakapojengwa kituo hicho na kukamilisha taratibu nyingine muhimu ambapo kiongozi wa wajumbe hao Park Joosung amesema mradi huo ni mwendelezo wa ushirikiano wa Korea Kusini na Tanzania katika kuimarisha uhifadhi.

Akizungumza na ujumbe huo mkuu wa hifadhi ya taifa ya serengeti Wiliam Mwakilema amesema kituo hicho kikikamilika kitaongeza chachu utalii na kitatoa fursa kwa wageni kuona aina nyingi zaidi za wanyama.

Naye mratibu wa ujenzi bw Victor Ketance amesema ujenzi utaanza mwezi october mwaka huu na unatarajiwa kumalizika baada ya miezi 14.

DC STAKI ATENGA SIKU YA JUMATATU KUSHIRIKI SHUGHULI ZA MAENDELEO

Mkuu wa Wilaya ya Same Mkoani Kilimanjaro Mhe Rosemary Staki Senyamule akishiriki shughuli za maendeleo kwa kufyeka baadhi ya vichaka

Mkuu wa Wilaya ya Same Mkoani Kilimanjaro Mhe Rosemary Staki Senyamule akizungumza na viongozi wa Kijiji na Kata ya Gonja Maore na baadhi ya wajumbe wa kamati ya siasa Wilaya

Dc Senyamule akishiriki zoezi la kupanga matofali yaliyofyatuliwa na wananchi wenyewe kwa ajili ya miradi ya maendeleo Wilayani humo.

Na Mathias Canal, Kilimanjaro

Mkuu wa Wilaya ya Same Mkoani Kilimanjaro Mhe Rosemary Staki Senyamule ametenga Siku moja katika Juma ili kushiriki shughuli za maendeleo kwa kushirikiana na wananchi.

Huu ni utaratibu ambao Mkuu huyo wa Wilaya ameuanzisha kwa muktadha wa kuchochea ari katika utendaji Kazi na uwajibikani kwa kila mwananchi ili kuimarisha na kusukuma kwa vitendo juhudi ya Rais wa Jamhuri ya Muungano wa Tanzania Dkt John Joseph Pombe Magufuli kwa vitendo na utekelezaji wa utendaji kazi ili kuakisi dhana nzima ya serikali hii ya awamu ya tano ya Hapa Kazi Tu.

"Nimeamua kutenga siku hii ya jumatatu kwani naamini italeta hamasa kwa wananchi kupenda kazi za maendeleo, itawatia moyo na kuona kuwa serikali ipo karibu nao ". Alisema Staki

Akizungumzia kuhusu kuanza kwa vitendo utekelezaji wa Ilani ya Chama Cha Mapinduzi Dc Staki amesema kuwa asilimia kubwa ya watanzania wanaoishi kwa mazoea ya kuyumbishwa na siasa zisizo na manufaa kwao lakini huu si wakati tena wa kurudi nyuma badala yake watanzania wote wanapaswa kushirikiana katika kufanya Kazi na kulifanya Taifa Letu kufika mbali zaidi kimaendeleo.

Hii imekuwa ziara ya mwanzo ya Mkuu huyo wa Wilaya ya Same Mhe Rosemary Staki kwa kushiriki kufanya kazi za Jamii akiwa na dhamira ya kuwatia Moyo wananchi ili kupunguza lawama zisizo na lazima kwa serikali na badala yake kujituma katika kufanya kazi.

Ziara hiyo katika kushiriki Kazi za jamii imefanyika katika kijiji cha Mheza na Maore vilivyopo kata ya Gonja Maore huku wananchi wakijitokeza kwa wingi kuishauri na kushirikiana na serikali.

Kwa upande wawananchi wa maeneo hayo walionyesha kufurahishwa na utaratibu huo ambao haujawahi kufanyika na kiongozi yeyote katika Wilaya ya Same tangu kuumbwa kwa msingi ya ulimwengu.

Wananchi hao wamemuakikishia Mkuu hiyo wa Wilaya hiyo kuwa watashirikiana nae katika shughuli za maendeleo kwani kwa kiasi kikubwa udini na uzembe wa watendaji wengi umesababisha kuendelea kuzorota kwa maendeleo ya Wilaya, Mkoa na Taifa kwa ujumla.

Pamoja na hayo pia Dc Staki Ametoa onyo kwa wananchi hususani Vijana ambao ni wavivu katika kushiriki shughuli za Jamii kuchukuliwa hatua Kali za kinidhamu kW kila mwananchi atakayeshindwa kutekeleza wajibu wake.

WANAFUNZI WA SHULE YA MSINGI SINDE JIJINI MBEYA WAPO HATARINI KUUGUA MAGONJWA YA MLIPIKO

Wanafunzi wa Shule ya Msingi Sinde Kata ya Sinde katika Halmashauri ya Jiji la Mbeya, mkoani Mbeya wa kunywa maji kwenye chemchem ya maji wakati wa mapumziko jana. Wanafunzi hao wako hatarini kuugua magonjwa ya mlipuko kutokana na kunywa maji yasio safi na salama kutoka kwenye Korongo la maji lililopo karibu na shule hao kama ilivyokutwa na mpigapicha wetu. Korongo hilo maarufu kwa jina la Afrika linatumiwa pia na wakazi wa eneo hilo kwa ajili ya matumizi mbalimbali ya majumbani. Wanafunzi hao waliambia mpigapicha wa gazeti hili kuwa wapo baadhi ya wenzao ambao wameugua ugonjwa wa Kichocho pamoja na homa ya matumbo kutokana na kunywa maji hayo. Shule ya Msingi Sinde pia inakabiliwa na ukosefu maji ya bomba pamoja na ubovu wa miuudombinu ya vyoo vya wanafunzi. (Picha na Friday Simbaya)