MKUU WA WILAYA AWAAMURU MADEREVA KUSHUSHA MBOLEA

Mkuu wa wilaya ya Namtumbo mkoani Ruvuma Luckness Amlima Leo ameamuru mbolea iliyokuwa imeletwa wilayani humo kwa ajili ya wakulima wa zao la Tumbaku na madereva kuzuia kushusha mbolea hiyo wakidai walipwe gharama za usafirishaji wa mbolea hizo ameamuru zishushwe mara moja na wagawiwe wakulima.

Akiongea na madereva na wakulima hao katika viwanja vya ushirika wilayani humo mkuu wa wilaya huyo alisema kuwa hakuna sababu ya kuendelea kubaki na mbolea kwenye magari huku wakulima wakilalamikia tumbaku inaharibika kwa kukosa mbolea.

“Shusheni mbolea kwani madai ya fedha ya kusafirishia mbolea hiyo yanafanyiwa kazi na chama kikuu cha Ushirika SONAMCU alisema mkuu wa wilaya huyo.

Aidha mwandishi msaidizi wa chama cha msingi Namtumbo bwana Nasoro Makomaye alisema kuwa mbolea ilifika wiki mbili zilizopita lakini madereva walikataa kushusha mbolea hiyo wakidai fedha ya kusafirishia mbolea hiyo.

Bwana Nasoro alimshukuru mkuu wa wilaya ya Namtumbo kwa kuwasikiliza kilio chao cha kushusha mbolea hiyo na wakulima wagawiwe mbolea hiyo na waweze kuitumia katika zao la Tumbaku.

Hata hivyo bwana Nasoro aliongeza kuwa kitendo cha mbolea hiyo kucheleweshwa itasababisha mapato ya uzalishaji wa zao la tumbaku kushuka na hasa ukizingatia muda wa kuweka mbolea kwenye zao hilo ulisha pita.

Naye Hamisi Rajabu Lyemo mkulima wa zao la Tumbaku alidai kuwa pamoja na mkuu wa wilaya kuwasaidia katika kuhakikisha mbolea hiyo inateremshwa na wanagawiwa wakulima bado mbolea hiyo haina tija sana kwa wakulima kutokana na namna ilivyochelewa kuletwa kwa wakati.

Bwana Hamisi alidai alipamba tumbaku shambani kwake tarehe 11.Desemba mwaka huu na alitakiwa kuweka mbolea siku saba baada ya kupanda yaani tarehe 18Desemba lakini tumbaku hizo zimekomaa bila mbolea na kuonesha wasiwasi wake katika uzalishaji wa zao hilo pamoja na kukosekana kwa ubora wa zao hilo.

Madereva wa magari yaliyoamriwa kushusha mbolea hiyo bwana Elieza Mshana na Hamza Shelukindo wakazi wa Dar-es-salaam walidai wanakubaliana na maamuzi ya mkuu wa wilaya kushusha mbolea na kumwomba mkuu wa wilaya huyo kusimamia malipo yao ya usafirishaji wa mbolea hiyo .

Katibu wa mbunge wa jimbo la Namtumbo Kalela Amimu ambaye ndiye msimamizi wa ugawaji wa mbolea hizo alisema kuwa mahitaji ya mbolea katika wilaya ya Namtumbo ni mifuko 11061 ikiwa mbolea ya NPK ni mifuko 6,617 mbolea ya CAN mifuko 2,222 na mifuko 2,222 ya UREA ambapo mpaka sasa mbolea iliyopokelewa ni mifuko 6000 pekee.

MEYA MANISPAA YA IRINGA ABADILISHIWA HATI YA MASHITAKA

 

Mahakama ya Hakimu Mkazi Wilaya ya Iringa imeahirisha kesi inayomkabili Meya wa Maanispaa ya Iringa Alex Kimbe ya kutishia kuua mtu kwa bastola hadi kesho baada ya mwendesha mashitaka wa upande wa Jamhuri kubadilisha hati ya mashitaka ya kesi hiyo. 

Kesi hiyo namba 189 ya mwaka 2017,ilikuja kwa ajili ya kusikilizwa hoja za awali na upande wa Jamuhuri ulidai uko tayari lakini wakili wa upande wa utetezi Samson Rutebuka alidai mahakamani hapo kuwa hakuwa tayari kwa hatua hiyo kutokana na kuhitaji muda kwa ajili ya kujisoma kabla ya kuanza usikilizwaji wa kesi hiyo.

Hakimu Mpitanjia alihoji upande wa Jamuhuri sababu za wakili wa utetezi kutopatiwa hati hiyo hadi jana ambapo alijibiwa kuwa ni kutokana na dhamira ya Jamhuri kutaka kubadilisha hati ya Mashitaka.

"Mheshimiwa Hakimu tumeshindwa kumpatia wakili wa utetezi hati ya mashitaka kwa kuwa tunatarajia kuwasilisha ombi la kubadilisha hati hiyo ,hivyo tusingempatia kabla haijasajiliwa mahakamani,'alisema Mwita.

Hakimu alikubaliana na ombi la upande wa Jamhuri na kuruhusu hati hiyo isomwe upya huku pia akikubaliana na upande wa utetezi wa kuahirisha kesi hiyo hadi kesho itakapoanza usikilizwaji wa hoja za awali.

Katika hati hiyo iliyosomwa jana na Wakili wa serikali Mwita, mahakama ilielezwa kuwa mtuhumiwa anashitakiwa kwa makosa mawili la kwanza ni la kukutwa na risasi nyingi kuliko kibali chake kinyume na kifungu namba 22 (1) a na 60 (1) cha umiliki wa siraha ya mwaka 2015.

Ilidaiwa kuwa mnamo Novemba 26 mwaka jana katika eneo la Zizi ndani ya wilaya ya Iringa mtuhumiwa alikutwa na risasi nyingi kinyume na sheria.

Katika kosa la pili ilidaiwa kuwa Novemba 26 mwaka jana katika eneo la kata ya Kitwiru wilaya ya Iringa mtuhumiwa alitishia kumuia Alfonce Patrick kinyume na sheria kifungu cha 89(2) (a ) cha Kanuni ya adhabu.

Mtuhumiwa alikana makosa yote mawili na kesi hiyo inatarajia kuaendelea kesho mahakamani hapo kwa usikilizwaji wa hoja za awali baada ya upande wa mashtaka kudai umekamilisha upelelezi.

Kimbe alifikishwa mahakamani hapo kwa mara ya kwanza Novemba 28, kabla ya kuahirishwa hadi Desemba 12, mwaka jana kisha kupangiwa Januari 11 mwaka huu aliahirishwa hadi Januari 29 na kisha kupangiwa February 5. 

Kesi hiyo inatarajia kuaendelea leo kwa kuanza usikilizwaji wa hoja za awali baada ya upande wa mashitaka kudai uko tayari kwa hatua hiyo na upande wa utetezi ukidai utakuwa umekamilisha zoezi la kupitia nyaraka za kesi husika. 

MADIWANI WANNE WAPYA WAPISHWA MANISPAA YA IRINGA

Diwani wa Kata ya Kitwiru (kushoto)kupitia CCM anakula kiapo mbele ya Baraza la Madiwani la Manispaa ya Iringa katika Jimbo la Iringa Mjini huku hakimu mfawidhi wa mahakama ya hakimu mkazi mkoa wa Iringa David Ngunyale (kulia) akisimamia kiapo hicho jana. (Picha na Friday Simbaya)

Diwani wa Viti Maalum Rehema Mbetwa (kushoto) anakula kiapo mbele ya Baraza la Madiwani la Manispaa ya Iringa huku hakimu mfawidhi wa mahakama ya hakimu mkazi mkoa wa Iringa David Ngunyale (kulia) akisimamia kiapo hicho jana. (Picha na Friday Simbaya)

MADIWANI wanne wapya wa Manispaa ya Iringa wawili kutoka CCM na wawili kutoka Chadema wameapishwa leo na kukabidhiwa nyaraka mbalimbali tayari kwa kuanza kazi ya uwakilishi wa wananchi katika maeneo yao jana. 

Walioapishwa katika baraza la madiwani ya robo ya pili ya mwaka 2018 ni pamoja na Jully Sawani kupitia CCM kata ya Kihesa ambaye katika uchaguzi wa Janauri 13 alipita bila kupingwa baada ya vyama vya upinzani kususia uchaguzi. 

Mwingine ni aliyewahi kuwa diwani wa kata ya Kitwiru Baraka Kimata ambaye Agost mwaka jana alijiuzuluwa wadhifa wake wa udiwani wa kata ya Kitwiru na kujiunga na CCM ambapo katika uchaguzi wa Novemba 26 alichaguliwa tena kuwa diwani wa kata ileile kupitia CCM. 

Madiwani wengine wawili ni waviti maalum amabo ni Maimuna Mpogole na Rehema Mbetwa wote wa Chadema, wawili hao wameteuliwa na tume ya Taifa ya Uchaguzi NEC kuziba nafasi iliyoachwa wazi na Leah Mleleu na Husna Daudi ambao walitimika Chadema na kuhamia CCM. 

Akizungumza mara baada ya kuapishwa kwa madiwani hao Meya wa Manispaa ya Iringa Alex Kimbe amewataka madiwani hao kusoma vizuri kanuni za uendeshaji wa baraza la madiwani ili waweze kuwa na mchango chanya kwenye halmashauri yao. 

naye Mkuu wa Wilaya ya Iringa Richard Kasesela ambaye alihudhuria kikoa cha baraza hilo la madiwani kama mshauri wa baraza hilo aliwapongeza madiwani wote walioapishwa, lakini akawaomba wakazi wa Iringa kuacha siasa za chuki alizodai kwamba hazina tija kwao na kwa taifa lao. 

Alisema vyama visiwagawe wananchi na kwamba si jambo jema kutendeana vitendo vibaya kwa kuwa hata mbinguni hakuna vyama vya siasa. 

Maidwani walioapishwa wamedai wamejipanga kuzitumikia nyazifa zao walizopatiwa na wananchi kwamba watahakikisha wanakuwa na uwakilishi chanya kwenye halmashauri yao. 

"Mimi kwanza ni washukuru wananchi walionichagua, nilikuwa diwani na nimeapishwa kuwa diwani tena safari hii ni kitokea Chama kinachoshikilia dola na ambacho ilani yake ndiyo inayotekelezwa,"alisema Baraka Kimata diwani kata ya Kitwiru. 

Diwani wa kata ya Kihesa Jully Sawani alisema yeye amejipanga kufanya kazi na asingependa kuwa mtu wa maneno maneno. 

"Mimi niwaombe wakazi wa kata ya Kihesa ushirikiano, tuachane na mambo ya siasa tufanye kazi za maendeleo, tuachane na siasa, siasa hizi za vyama zisitutangenishe sisi,"alisema Sawani. 

Madiwani wote wa viti maalumu walisema wao wanashukuru chama chao na uongozi wa Halmashauri kwa kuwaamini na kuwafanya kuwa sehemu ya baraza la madiwani na kwamba watahakikisha wanawajibika ipasavyo.