CCM KURA ZA MAONI

Tawi la Idunda katika Kata ya Mtwivilla, Manispaa ya Iringa katika harakati za kupiga kura za maoni ndani ya CCM ilikuwapata mbunge na diwani leo.

WALIMU WAKOPESHWA PIKIPIKI

Pikipiki zikiwa nje ya ofisi ya SACCOS ya walimu mjini Iringa.

Na Friday Simbaya,
Iringa

CHAMA cha Ushirika cha Akiba na Kukopa cha Walimu wa Iringa Vijini na Kilolo (IRTS-SACCOS LTD) kimekabidhi pikipiki kwa walimu wanachama 19 katika hafla fupi iliyofanyika katika viwanja vya ofisi ya chama hicho jana.

Pikipiki hizo 19, zilitolewa kwa walimu 19 kati ya 27 walikubaliwa kupewa na juhudi zaidi zinafanyika kupata pikipiki nyingine nane (8) zilizobaki ili walimu hao nao waweze kupewa mapema.

Akikabidhi pikipiki kwa walimu, Afisa Elimu wa Wilaya shule za msingi (DEO), William Mkagwa, kwa niaba Mkurugenzi wa Halmashauri ya Iringa (DED), Tina Sekambo, alisema kuwa amefurahishwa na juhudi za SACCOS ya kutatua matatizo ya usafari kwa walimu wanachama kwa kutoa mikopo ya pikipiki ambazo zitarahisisha sana usafari kutokana na hali ya jiografia ya Wilaya.

Aidha, Sekambo alishauri pia utaratibu wa mikopo ya vyombo hivi uwe endelevu ili hatimaye walimu wote waweze kupata vyombo hivi.

“Ningependa pia nizungumza suala la mikopo, wafanyakazi wengi wamekuwa na tabia ya kukopa katika taasisi mbalimbali zaidi ya mkopo mmoja kwa wakati, ni vizuri ukamaliza mkopo huu wa pikipiki kabla ya kukopa kwingine, kwani mwisho wa siku familia itapata maisha magumu sana pale mfanyakazi anapokuwa hana cha kupeleka nyumbani mwisho wa mwezi,” alisema.

Aliongeza kuwa vyombo hivi vikitumiwe vizuri kwa sababu vinaweza kuwa kichocheo cha kuinua taaluma na maisha ya walimu katika wilaya.

Lakini vyombo hivyo vya usafari vikitumika vibaya vinaweza kuleta madhara makubwa kwa walimu na hatimaye kurudisha nyuma juhudi za wizara katika kutoa elimu bora kwa watoto na kubadilisha maisha ya walimu.

Katibu wa SACCOS, John Mfalamagoha alisema kuwa chama kilianzishwa mwaka 1997 hadi kufikia tarehe 30/07/2010 chama kilikuwa na jumla ya wanachama 1,197 kati yao wanaume ni 564 na wanawake ni 633.

Alisema kuwa walimu waliomba mkopo ni 27 wakiwamo wanaume 20 na wanwake saba (7) lakini walikabidhiwa ni wanaume 12 na wanawake saba jumla 19, na utaratibu wa kupata pikipiki zilizobaki unaendelea kufanyika na zikipatikana wakati wowote zitakabidhiwa kwa waliomba.

Aidha, katibu huyo alisema, malengo ya chama yalikuwa kutoa mkopo wa pikipiki 50 kwa mwaka 2010 lakini waombaji hawakujitokeza kwa wengi na hivyo kufanikiwa kupata waombaji waliokabidhiwa pikipiki jana.

Takwimu zinaonyesha kuwa watu waliopoteza maisha kutokana na ajali za pikipiki nchini mwaka 2010 181 kati ya jumla ya ajali 1,414 zilizotokea. Pia takwimu zinaonyesha kuwa asilimia 16 ya ajali ya 30,836 za ajali zilizotokea mwaka 2009.

Mwisho

MWENGE WAINGIA MKOANI IRINGA

Na. Friday Simbaya,
Ludewa

JUMLA ya miradi sabini na moja (71) yenye thamani ya shilingi 8,369,893,729 itakaguliwa, kuzinduliwa, itafunguliwa na kuwekwa mawe ya msingi mkoani Iringa kwa mwaka 2010 wakati wa mbio za mwenge.

Taarifa hiyo imetolewa na Katibu tawala mkoa wa Iringa Bibi. Gertrude Mpaka juzi wakati akisoma taarifa fupi ya mkoa wa Iringa wakati wa kupokea mwenge wa uhuru mwaka 2010 katika kijiji cha Kipingu, kata ya Manda wilayani Ludewa ukitokea mkoani Ruvuma.

Bi.Mpaka alisema miongoni mwa fedha hizo, shilingi 2,890,484,593 ni fedha toka Serikali kuu, shilingi 951,705,586 ni michango ya Halmashauri za Wilaya na Manispaa, thamani ya nguvu kazi ya wananchi ni shilingi 1,557,402,245, shilingi 1,413,904,000 ni michango ya watu binafsi na shilingi 1,556,397,305 ni michango ya wahisani na taasisi mbalimbali za maendeleo .

Mwenge wa uhuru mwaka huu unaongozwa na ujumbe usemao “Mapambano dhidi ya ugonjwa wa Ukimwi pamoja na Malaria”

Katibu tawala mkoa alielezia kuwa mapambano dhidi ya Ukimwi yanaendelea kwa kasi mkoani Iringa, na mkoa kwa kushirikiana na asasi za kitaifa na kimataifa na tume ya taifa ya kudhibiti Ukimwi Tanzania (TACAIDS) umetekeleza mpango maalumu wa miaka minne wa kupambana na tatizo la Ukimwi ambapo utekelezaji wake ulianza Oktoba, 2008 na utamalizika Septemba 2012 .

Ameyataja maeneo makuu kuwa ni; kuhakikisha upatikanaji wa kutosha na kuendelea kutoa elimu ya juu ya matumizi sahihi ya kondomu, kupeleka karibu na kuboresha huduma za afya kwa jamii ambapo katika kipindi cha 2008/ 2009 jumla ya vituo 35 vya kupima virisi vya Ukimwi na kuto ushauri nasaha (CTC) vimeboreshwa kwa kufanyiwa ukarabati na samani.

Aidha wataalam 227 wamepatiwa mafunzo rejea kuhusu virusi vya Ukimwi na ushauri nasaha na jumla ya wagonjwa 51,137 walifikiwa na huduma za kupima virusi vya Ukimwi na kupata ushauri nasaha (CTC).

Eneo jingine amelitaja kuwa ni kuzijengea uwezo jamii wa kupambana na mila na desturi hatarishi zinazochangia ongezeko la maambukizi mapya ya VVU. Pia kuboresha huduma za magonjwa ya zinaa ambapo katika kipindi cha mwaka 2008/ 2009 kulikuwa na jumla ya vituo 293 vinavyotoa huduma ya magonjwa ya zinaa, wataalamu 288 walipatiwa mafunzo rejea ya huduma za matibabu ya magonjwa ya zinaa na watu 7,569 walifikiwa matibabu ya magonjwa ya zinaa.

Bibi. Mpaka ameongeza eneo lingine kuwa ni kuongeza elimu na uhamasishaji juu ya masuala ya ngono salama kwa makundi yaliyo katika mazingira atarishi ambapo katika kipindi cha mwaka 2008/2009 jumla ya mikutano 395 ya uhamasishaji katika ngazi mbalimbali za jamii ilifanyika, aidha vikundi 181 vya kijamii vilishiriki na jumla ya vipeperushi na mabango 23,000 vya kuelimisha jamii.

Wakati huohuo katika mbio zake zilizoanza wilayani Ludewa jana Mwenge wa uhuru umekagua umekagua, kuzindua, kufungua na kuweka mawe ya msingi jumla ya miradi 13 yenye thamani ya shilingi bilioni 1.2.

MWAKALEBELA.................1

Bw. Fredrick Mwakalebela (Kulia) akiwa na Mkewe Bi. Selina Mwakalebela wakati wa mkutano na waandishi wa habari mijini Iringa jana.

FREDERICK Mwakalebela mmoja wa wanaCCM anayetafuta ridhaa ya wanachama wa Chama cha Mapinduzi (CCM) kuwania ubunge jimbo la Iringa Mjini amekanusha vikali madai ya rushwa yaliyotolewa dhidi yake na Taasisi ya Kuzuia na Kupambana na Rushwa (Takukuru).



Akizungumza na waandishi wa habari mjini hapa jana, Mwakalebela alisema hajawahi kukamatwa kwa madai hayo, lakini akakiri kuhojiwa na Takukuru ili atoe ufafanuzi kuhusu taarifa zilizotolewa dhidi yake kwa taasisi hiyo.



Akinukuu taarifa iliyotolewa na Kamanda wa Takukuru Mkoa wa Iringa, Donasian Kessy kwamba Julai 20 katika kijiji cha Mgongo aliitisha kikao nyumbani kwa Gwido Sanga ambacho kilihudhuriwa na wana CCM 22, Mwakalebela alisema alikutana na wana CCM hao na kutangaza nia yake ya kuwania ubunge katika jimbo hilo, na kwamba katika kikao hicho hakutoa rushwa ya aina yoyote kama ilivyodaiwa.



"Nilikutana kweli na wanachama hao nikawaleza historia yangu, na nikatangaza nia ya kuwania ubunge katika jimbo hili la Iringa Mjini na baadaye nikawaleleza malengo yangu endapo azma yangu hiyo itafanikiwa,baada ya hapo nikaondoka" alisema.



Hata hivyo alisema katika mkutano huo, mkewe Selina Mwakalebela anatuhumiwa na Takukuru kwa kutoa sh 100,000 kwa wanachama hao.



"Sifahamu chochote kuhusiana na madai ya mke wangu kutoa kiasi hicho cha fedha kwa wanachama hao, na malengo ya kufanya hivyo," alisema.



Alisema anashangaa kwanini Takukuru wamemuhusisha katika madai hayo ya mkewe kutoa kiasi hicho cha fedha, hususani katika kipindi hiki ambacho wanaCCM wanaenda kufanya maamuzi magumu ya kumpata mgombea wao.



"Mke wangu ni mke wangu, lakini kama kuna ushahidi wa yeye kufanya kosa, hilo lisichukuliwe kosa la familia," alisema.



Katika taarifa yake aliyoitoa juzi kwa waandishi wa habari Kessy alisema pamoja na Mwakalebela, aliyekuwa waziri katika serikali za awamu karibu zote Joseph Mungai anayewania ubunge Mufindi Kaskazini na Mkuu wa Wilaya ya Hai, Dk Norman Sigalla anayetafuta ridhaa hiyo jimbo la Makete na Fadhili Ngajilo jimbo la Iringa Mjini,walihojiwa kwa madai ya kuhusishwa na vitendo vya rushwa katika majimbo wanayogombea.