UHABA WA MADAWATI LUGARAWA WANAFUNZI SABA WAKALIA DAWATI MOJA. FUNZA NI CHANGAMOTO KWA WATOTO HAO

Wanafunzi wa Shule ya Msingi ya Lupefu, Lugarawa wakiwa darasani na Mwalimu Mary Mhagama huku wakiwa wamebanana saba kwenye dawati moja lenye uwezo wa watoto watatu.

WANAFUNZI katika Shule ya Msingi ya Lupefu iliyoko Kata ya Lugarawa wilayani Ludewa, mkoani Iringa wako hatarini kukatika miguu na viungo vingine vya mwili kutokana na kuliwa na funza mikono na miguu yao kunakosabishwa na uhaba wa madawati ambapo sasa wanafunzi saba wanalazimika kukalia dawati moja.
Mwalimu Mkuu wa shule hiyo Bi. Aprudensia Lugome amekiri kuwepo kwa matatizo hayo na kuongeza kuwa hali hiyo inatokana na ukata wa fedha unaoikabili shule yake pamoja na uelewa na mwamko mdogo wa wananchi juu ya elimu.
Lugome alisema hulazimika kila wakati kununua pini madukani kwa fedha zake na kuwaita wazazi wa wanafunzi wenye mafunza kufika shuleni kushiriki kuwatoa funza watoto wao hata hivyo hufika wachache.
 Aidha aliongeza kuwa uchakavu wa majengo na ukosefu wa vitabu vya kujifunzia kunatokana nakusahaulika kwa shule ya Lupefu iliyoko upande wa kusini magharibi katika ya kata ya Lugarawa Ludewa.
Alisema kuwa shule hiyo ilianzishwa mwaka 1978 na kwamba hadi sasa ina jumla ya wanafunzi 545, madawati 149, vyumba 10 vya madarasa kati ya hivyo vyenye ubora vikiwa vitatu, walimu 15 lakini walio wengi wakiwa na matatizo ya kiafya.
Kuhusu utoro kwa wanafunzi mwalimu Lugome alimwambia mwandishi wetu kuwa watoto wengi wanatoka umbali mrefu wengine kilomita 6 hasa katika milima ya Luholomela na Msango na kwamba umbali huo husababisha wachoke na kuishia vichakani inakuwa vigumu kwa walimu na wazazi kugundua hali hiyo.
Kwa upande wa vyoo mkuu huyo alisema kuwa vyoo vyote vilivyopo ni vya muda tu na kwamba kwa sasa anajenga matundu 12 ya choo cha wanawake kutokana na fedha za faini kwa wazazi wa watoto wenye funza.
Alisema pamoja na hali hiyo watoto wamekuwa wakianguka hovyo na kupoteza fahamu shuleni hapo lakini cha kushangaza wakati mwingine huzinduka baada ya muda mfupi wakipelekwa hospitalini, hatimaye huendelea na shughuli kama kawaida.
Alizitaja baadhi ya changamoto zinazoikabili shule yake kuwa ni pamoja na ukosefu wa fedha za kuendeshea shule ambapo hulazimika kufanya vibarua kwa walimu na watu wengine sanjari na kuuza kuni na matete tunapohitaji kununua mahitaji ya shule.
Amewataka wazazi kuwekeza katika elimu na kufuatilia kwa karibu maendeleo ya watoto wao. Lakini akaishauri serikali kwenda na wakati kwa kutoa mafunzo kwa walimu hasa wanapobadili sera mpya ya elimu.
Serikali haijatoa mwongozo mpya namna ya kuendesha shule hasa baada ya MEM kuonekana inalegalega kwa kutopatikana kwa fedha mashuleni na sasa shule nyingi zinaendeshwa kwa kusuasua.

ZAHANATI YA KILONDO NA LIFUMA ZAPATA WAGANGA WASTAAFU NI BAADA YA MBUNGE KULIPA POSHO TOKA MFUKONI MWAKE

.

WANANCHI katika Kata ya Kilondo wilayani Ludewa mkoani Iringa  wamepata furaha iliyopindukia na baadae kuikataa Boti iliyopelekwa na Mbunge wao   Deo Filikunjombe kama ‘Ambulance’ kwa ajili ya wagonjwa baada ya mbunge huyo kuwapelekea tena mganga katika zahanati yao.

Kilio cha muda mrefu kwa Wananchi wa Kilondo ni mganga ndiyo maana mbunge wao alipowapelekea mganga na boti kwa wakati mmoja walichagua mganga na kusema hakuna haja ya boti kwa sababu waliomba boti ili kuwasafirisha wagonjwa kuwapeleka kwa mganga.

Uamuzi wa mbunge huyo kuamua kutoa fedha yake ya mfukoni na kuwalipa posho waganga wastaafu ulikuja baada ya Halmashauri ya Wilaya kushindwa kupeleka waganga katika zahanati hizo huku wananchi wakipoteza maisha kwa magonjwa ya kawaida.

Akizungumza katika kikao cha Baraza Kuu la Madiwani kilichofanyika hivi karibuni Bw. Filikunjombe alisema kuwa wananchi wa Kilondo ni binadamu kama walivyo wengine, lakini wanakosa huduma muhimu pengine kutokana na mazingira magumu ya Kata  na wilaya nzima  .

Alisema kuwa kuna haja ya kuweka mkakati wa kudumu hasa kwa kuwasomesha vijana wa kutoka mazingira yale na kuingia nao mkataba shida itakwisha.akaongeza kuwa kote kuna mazingira magumu, lakini Kilondo kuna mazingira magumu zaidi kuliko Ibumi.

Mkakati huu ni vema uanze sasa lakini pia kwa kuwa mmeridhia kuwa wapelekwe waganga wastaafu kwa muda kutokana na kukosekana kwa waganga niko tayari kuchangia wakati Halmashauri inafanya mkakati wa kudumu kupata waganga katika zahanati ya Kilondo na Lifuma. alisema mbunge huyo.

Habari kutoka ndani ya ofisi ya utumishi zinasema watumishi hao wastaafu ambao ni Martha Ngalawa (Lifuma) na Philipo Kayombo Mbufu (Kilondo) watalipwa posho kulingana na mshahara waliokuwa wakipata kabla ya kustaafu kwao.

Mbunge huyo alitumia nafasi hiyo kuwataka madiwani kushiriana na watendaji wa Halmashauri kuliko kuwindana kwani kufanya hivyo kutadhoofisha maendeleo ya wananchi, akahimiza kufanyakazi kama timu kwa upendo kwa sababu lengo ni moja.

Bw Deo aliwaagiza viongozi, watendaji na bodi ya zabuni kuangalia na kutoa kipaumbele kwa kuwapa kazi makandarasi wa ndani wazalendo wenye uwezo ili kuongeza mzunguko wa fedha ndani ya halmashauri kuliko kutoa tenda zote kwa wageni ambao baada ya kumaliza huondoka na fedha nje ya wilaya.

Akiwakilisha hoja kwa niaba ya baraza, Diwani wa Viti Maalum Tarafa ya Masasi Bi Lucy Haule alisema  kuwa madiwani wa Ludewa wanakuwa wakiimba wimbo mmoja akimaanisha kuwa kutokana na shida inayowakabili wananchi wa mwambao na  kuwa Halmashauri imepata magari mawili ya wagonjwa ni vema na haki moja liende mwambao.

“Kutokana na shida iliyopo Kata ya Lupingu hasa inayowakabili wagonjwa na wajawazito baraza lako tukufu linaaigiza kwamba gari moja la wagonjwa lipelekwe katika kituo cha Lupingu kupunguza tatizo,” alisisitiza Bi. Lucy.

Baada ya kutoa agizo madiwani wote kwa kauli moja waungamkono hoja na kumwagiza Mkurugenzi wa Halmashauri ya Ludewa Bi Hilda Lauo kutekeleza agiza hilo bila kuchelewa na tayari gari hilo limeshapelekwa Lupingu.

 Filikunjombe aliwashukuru madiwani kwa kuridhia kwa upendo na utayari wa kuruhusu gari la wagonjwa kwenda kusaidia mwambao wa Ziwa Nyasa badala ya Mlangali, lakini aliahidi kulisimamia na kulifuatilia gari la Mlangali ili liweze kufika haraka.

WANOVISI WAKIBENEDKTINI

Baadhi ya wanovisi kutoka mashirika mbalimbali ya kitawa na walezi wao wakiwa katika picha ya pamoja na Askofu Mkuu wa Jimbo Kuu la Songea Norbert Mtega (katika walioketi) katika kongamano lao la kubadilishana mawazo na ujuzi hivi karibuni. Walioudhuria kongamano hilo ni  watawa kutoka katika nyumba za kitawa za Peramiho (Wenyeji), Abasia ya Ndanda, Abasia ya Hanga, Abasia ya Mvimwa, Bikiria Maria Msaada wa Wakristo Ndanda-Ndolo, Mt. Agnes Chipole, Wakaimadores-Mafinga na Mt. Gertrude Imilwaha.