NGURUWE 612 WAFA KWA MAFUA LUDEWA DC APIGA MARUFUKU WATU KUMLA MNYAMA HUYO

LUDEWA

MKUU wa Wilaya ya Ludewa Bi. Georgina Bundala amepiga marufuku kwa muda usiojulikana kuchinja au kula na kusafirisha nguruwe pamoja na mazao yake kama vile nyama, mifupa, nywele na mazao ya kusindika kutokana na homa ya nguruwe kupiga hodi tena wilayani humo.

Bi. Bundala alisema endapo mfanyabiashara au mfugaji yeyote atabainika akisafirisha nguruwe kutoka katika maeneo yaliyoathirika na kupeleka maeneo yasiyoathirika mtu huyo atakuwa amekiuka agizo na hatua kali zitachukuliwa dhidi yake.

Aidha amewaagiza wataalamu wote wa kilimo na mifugo, maafisa watendaji kata na vijiji kusimamia agizo hili ili kuwathibiti wale wote wasiokuwa waaminifu wanaosafirisha nyama ya nguruwe kwa siri wakidhani wanajificha.

Akitoa taarifa na takwimu za ugonjwa huo kwa Mkuu wa Wilaya, Daktari wa Mifugo wilayani Ludewa Bw. Festo Mkomba alisema maambukizi mapya ya homa ya nguruwe yametokea katika tarafa ya Mwambao wa Ziwa Nyasa na sasa yapo katika tarafa ya Mawengi.

Dr. Mkomba alisema tangu ugonjwa huo uingie wilayani Ludewa tayari nguruwe 612 kati ya nguruwe 2,356 waliopo wilayani humo wameshakufa na kwamba Lumbila wamekufa 154, Lupingu 214, Kilondo 148 na Mawengi 40 na kusema kasi hiyo ni kubwa sana kiuchumi.

Katika tangazo lake kwa wananchi Bw. Festo Mkomba ambaye ni Daktari wa mifugo wilayani Ludewa alisema kuanzia Septemba 20 mwaka huu Wilaya ya Ludewa itakuwa chini ya karantini mpaka hapo itakapotangazwa vinginevyo kutokana na matukio ya homa ya nguruwe kujitokeza tena wilayani Ludewa.

Awali, Bw. Marco Mhagama mtaalamu wa mifugo alisema wafanyabiashara, wafugaji na walazi ndio wanaosababisha kurudiarudia kwa ugonjwa huo kwani wamekuwa na tabia ya kupuuzia maelekezo wanayopewa na wataalamu wa mifugo juu ya kukabiliana na homa ya nguruwe.

Bw. Mhagama alisema kuwa kimsingi na kitaalamu homa ya nguruwe haina madhara ya moja kwa moja katika afya ya binadamu, lakini wananchi wengi wilayani Ludewa wanategemea mifugo hiyo katika kuinua uchumi na kuongeza kipato chao.

“Februari mwaka huu katantini kama hiyo iliwekwa baada ya ugonjwa huo kuua idadi kubwa ya nguruwe na baadaye mwezi June tuliruhusu kuanza kuchinjwa na kula, lakini wananchi wenyewe wamekuwa wazembe kwa kukosa uaminifu,” alisema mhagama.

Homa ya mafua ya nguruwe siku zote imekuwa ikiingia wilayani Ludewa kupitia vijiji vilivyopo kandokando ya Ziwa Nyasa na kwamba asili ya  ugonjwa huo ni kutoka nchi jirani ya Malawi kupitia wafanyabiashara wa Kyela, hivyo kuna kila sababu ya serikali kuongeza nguvu ya ziada katika kuthibiti homa hii katika maeneo hayo. 

WAHASIBU KORTINI KWA WIZI WA MILIONI 79.8 MAKETE

Makete

WATUMISHI wanne wa Halmashauri ya wilaya ya Makete kitengo cha fedha wamefikishwa mahakamani kwa makosa 233 yakiwemo wizi wa fedha zaidi ya 79.8m/- mali ya umma.

Watumishi hao ni pamoja na Bw. Golden Asheri Sanga Mkuu wa Kitengo cha Uhasibu katika Halmashauri hiyo na mke wake aitwaye Bi. Naheri Paten Chengula ambaye ni mwalimu katika Shule ya Msingi Makete.

Wengine waliofikishwa mahakamani hapo ni pamoja na Sued Abdul Milanzi na Ernest Mwangomela wote wahasibu wasaidizi katika halmashauri hiyo ya Makete.

Akisoma hati ya mashtaka mbele ya Hakimu Mkazi wa mahakama hiyo mheshimiwa Chanjalika mwendesha mashtaka mrakibu msaidizi wa polisi ambaye ni mkuu wa upelelezi wilaya ya Makete ASP Komba aliiambia mahakama kuwa washtakiwa wote kwa pamoja wanakabiliwa na mashtaka 233 ikiwemo wizi.

Bw Komba aliyataja makosa mengine kuwa ni pamoja na wizi wakiwa watumishi, kula njama za kuiibia serikali na kuingiza hesabu za uongo katika vitabu vya serikali huku wakijua kuwa kufanya hivyo ni kosa la janai na kwamba wamekuwa wakitenda makosa hayo kwa kipindi cha miaka minne hadi walipogundulika na Benki ya NMB Tawi la Makete mwezi Juni mwaka huu.

Hata hivyo washtakiwa wote walikana kuhusika na makosa hayo na kumwomba kuwapa dhamana ambapo upande wa mashtaka haukuwa na pingamizi kwa sababu dhamana ni haki yao ingawa mwendesha mashtaka alimtaka Hakimu kuzingatia kifungu 148 (4) cha mwenendo wa mashtaka sura ya 16 iliyofanyiwa marekebisho mwaka 2000.

Akisoma kifungu hicho Bw Komba alisema kuwa wizi wowote unaozidi kiwango cha shilingi 10m/- mdhamini anatakiwa kutoa fedha taslimu inayolingana au nusu yake, lakini wadhamini na washtakiwa walishindwa kutimiza masharti hayo.

Akifafanua na kutafsiri kifungu hicho Hakimu Chanjalika alikubaliana na mwendesha mashtaka lakini akasema dhmana ni haki ya mshtakiwa hata hivyo mahakama imepewa uwezo na mamlaka ya kuamua na kuona inavyofaa kama wadhamini na washtakiwa watakosa kutimiza sharti hilo.

Kutokana na uwezo huo kisheria, mahakama katika wilaya ya Makete, iliamuru kila mshtakiwa kuleta wadhamini wawili wenye hati ya mali isiyohamishika lakini yenye thamani ya shilingi 20m/- kila mmoja.