Mwenyekiti wa Chadema apewa siku 14 awe amelipa kodi

Miezi takribani mitano iliyopita tangu aondolewe Billcanas, siku moja tangu Serikali imzuie asiendelee na shughuli za kilimo katika shamba lake, Mwenyekiti huyo wa Chadema amepewa siku 14 awe amelipa kodi inayokadiriwa kufika milioni 13.5, ya hoteli yake ya Aishi iliyoko Machame Mkoani Kilimanjaro.

Uamuzi huo mpya wa Serikali wa Wilaya ya Hai, Mkoani Kilimanjaro,umefikia hatua hiyo ikiwa ni siku moja baada ya Mkuu wa Wilaya hiyo Gellasius Byakanwa, kutangaza kusitisha shughuli za kilimo katika shamba la Veggies analomiliki Mbowe kutokana na kile kilichosema lipo ndani ya chanzo cha maji.

Byakanwa amesema kuwa Serikali ya awamu ya Tano imelenga kukusanya mapato ili iweze kutekeleza majukumu yake ikiwamo kutekeleza ilani ya Chama cha Mapinduzi (CCM).

“Hatuwezi kufikia malengo ya ukusanyaji mapato yetu ya ndani kama kuna wafanyabiashara wakubwa kama huyo wanakwepa kulipa kodi, na tena kwa kipindi chote hicho ameshindwa kuleta hali ya mauzo yake ambayo yataweza kujulikana kiasi anachostahili kulipa kodi,”amesema Byakanwa.

Hata hivyo Mkuu huyo wa Wilaya amemshutumu Mbowe kwa kufanya uharibifu wa mazingira kwa kuvuna miti ya asili bila kibali cha mkuu wa Wilaya kulingana na uamuzi wa Kamati ya ushauri ya Mkoa (RCC) pamoja na kuvuta maji kwa kutumia mashine kinyume na kibali na taratibu za utumiaji wa maji mfereji.

WAUMINI WAAMUA KUMZUIA KANISANI ASKOFU MOKIWA

Askofu wa Dayosisi ya Dar es Salaam wa Kanisa la Anglikana, Dk valentino Mokiwa jana alishindwa kuendesha vikao viwili baada ya kundi la waumini kufika Usharika wa Ilala kwa lengo la kuzuia.

Askofu Mokiwa, ambaye anapinga uamuzi wa Askofu Mkuu wa Anglikana, Dk Jacob Chimeledya kumvua madaraka kutokana na tuhuma za matumizi mabaya ya fedha, alikuwa aendeshe vikao vya kamati ya fedha na halmashauri kuu, lakini alilazimika kuviahirisha baada ya kundi hilo kufika eneo hilo.

Wakati waumini hao wakizuia vikao hivyo kufanyika, mashemasi, mapadri, wainjilisti na waumini wa dayosisi hiyo wametoa tamko la kumuunga mkono Dk Mokiwa wakipinga uamuzi wa mkuu wa kanisa hilo kumvua madaraka.

Askofu Mokiwa anapinga uamuzi wa kumvua madaraka akisema hauwezi kufanywa na mkuu wa kanisa, bali na halmashauri kuu ya jimbo ambayo anasema haikushirikishwa zaidi ya kutaarifiwa uamuzi huo.

Tukio la jana la kumzuia Dk Mokiwa kufanya mkutano lilitokea saa mbili asubuhi katika Kanisa la Mtakatifu Nicolau wilayani Ilala, ambako kuna ofisi ya Askofu wa Dayosisi ya Dar es Salaam.

Mmoja wa watu walioshiriki kuzuia vikao hivyo, Haule Sylvester ambaye alijitambulisha kuwa kiongozi wa waumini wa Anglikana jijini Dar es Salaam, alisema walichukua uamuzi huo kwa kuwa Dk Mokiwa ameshavuliwa uaskofu.

“Huyu (Dk Mokiwa) hapaswi kufanya shughuli zozote za kanisa kwa sababu si askofu. Lakini amekuwa akiendesha vikao vya siri na mapadri wanaomuunga mkono,” alisema Sylvester.

“Jana (juzi) alifanya kikao cha siri. Leo (jana) alikuwa aongoze vikao viwili, kikiwamo cha bodi ya fedha ya dayosisi hii, ndiyo maana tumemzuia.”

Alifafanua kuwa baada ya kikao hicho cha fedha kilichokuwa kimepangwa kuanza saa 3:00 asubuhi, kikao ambacho kingefuata ni cha halmashauri kuu ya dayosisi ambacho kingefanya uamuzi wa mambo ambayo yangejadiliwa na bodi ya fedha.

Sylvester alisema kwa mujibu wa katiba ya dayosisi hiyo, vikao hivyo vyote vinatakiwa viongozwe na mwenyekiti ambaye ni askofu wa dayosisi.

ASKOFU MDEGELLA WA KKKT IRINGA AAGWA KWA KUZAWADIWA NYUMBA NA GARI

Askofu wa Kanisa la Kiinjili la Kilutheri Tanzania (KKKT) Dayosisi ya Kusini, Isaya Mengele (kushoto) akimpongeza Askofu Dkt. Owdenburg Mdegella katika ibada maalum iliyofanyika katika usharika wa Kanisa Kuu (Cathedral) Iringa mjini leo. (Picha na Friday Simbaya)

KANISA la Kiinjili la Kilutheri Tanzania (KKKT) Dayosisi ya Iringa limemzawadia Askofu Dkt. Owdenburg Mdegella aliyemaliza muda wake wa uaskofu nyumba na gari vyenye thamani ya shilingi milioni 123. (123m/-).

Kanisa limeamua kumzawadia nyumba yenye thamani ya shilingi milioni 55/- iliyopo katika mtaa wa Kihesa-Kilolo Manispaa ya Iringa na gari aina ya Toyota Haice Pickup double cabin yenye thamani ya shilingi milioni 68/-.

Askofu Mdegella alizaliwa mwaka 1951 katika Kijiji cha Ipalamwa, Wilaya ya Kilolo mkoani Iringa. 

Askofu huyo amekuwa askofu mkuu wa dayosisi ya Iringa ya Kanisa la Kiinjili la Kilutheri Tanzania kwa miaka 38 kama mchungaji, na miaka 30 kama askofu .

Askofu huyo ameagwa leo (jumatatu) katika ibada maalum ya kustaafu kwa heshima iliyofanyika katika usharika wa Kanisa Kuu (Cathedral) Iringa mjini, ibada ambayo ilihudhuriwa na Mkuu wa Kanisa la KKKT, Askofu Dkt. Fredrick Shoo.

Akisoma hati ya kustaafu kwa heshima askofu dkt owdenburg mdegella kwa niaba ya kanisa la KKKT, Katibu Mkuu wa KKKT- Dayosisi ya Iringa, Nayman Chavalla alisema kuwa Askofu Mdegella alichaguliwa na Mkutano Mkuu wa Kwanza wa Dayosisi ya Iringa tarehe 8 Oktoba mwaka 1986 kuwa askofu kwa mujibu wa katiba ya dayosisi ya Iringa ya kanisa la KKKT.

Chavalla alisema kuwa kwa niaba ya washarika wote 142,000 wa dayosisi hiyo, askofu huyo amestaafu rasmi na kwa heshima.

Alisema kuwa Askofu Mdegella aliwekwa wakfu kuwa askofu na kuingizwa kazini kuwa mkuu wa dayosisi katika ibada iliyofanyika uwanja wa samora, mjini iringa tarehe 27 januari, 1987.

Kwa upande wake, Askofu mstaafu Dkt. Mdegella kwa niaba ya Dayosisi ya Iringa amewapongeza washarika kwa zawadi na kumshukuru Mungu kwa utumishi wake.

Alisema kuwa kama mchungaji mara nyingi alikumbana na uasi, kupingwa, na kutishiwa maisha yake alipokuwa akitetea kweli ya injili, lakini kwa nguvu za Mwenyezi Mungu alishinda changamoto hizo.

Ibada maalum ya kustaafu kwa heshima Baba Askofu Dkt. Owdenburg Mdegella ilihudhuria na wageni mbalimbali kutoka Ujerumani, Sweden na Marekani pamoja na viongozi wa serikali ya mkoa wa Iringa na viongozi wa siasa na washarika wa Dayosisi ya Iringa.