MADEREVA WAASWA KUZINGATIA ALAMA ZA BARABARANI

Na Vicky Macha,

Iringa.

MADEREVA wanatakiwa kuzingatia alama za barabarani ili kukabiliana na ajali za mara kwa mara  hasa zinazojitokeza katika barabara kuu ya Tanzania na Zambia (TANZAM).

Rai hiyo ilitolewa jana na Mkandarasi wa Mradi wa ujenzi wa barabara kutoka makao makuu (Tanroads) Kenfas Mahenge wakati wa makabidhiano rasmi ya barabara hiyo na  makandarasi wa kampuni ya Aarsleff- Interbeton Denmark mara baada ya kumalizika kwa ujenzi wa barabara hiyo mwishoni mwa wiki.

Mahenge alisema hali ya nchi ilivyo ambayo ni ya milima, miteremko na kona nyingi hasa katika maeneo ya hifadhi ya wanyamaMikumi ni lazima kila dereva kuzingatia alama hizo pindi apitapo katika barabara hiyo kwani kumekuwa na ongezeko la ajali zinazoendelea kuwatafuna wananchi hasa abiria.

Alisema kwa kuliona hilo walilazimika kumtaka mkadarasi kuweka kila eneo alama ikiwemo matuta, lakini kumeoneka  madereva kuendesha magari kwa uzoefu mbali na kupatiwa elimu ya udereva.

Hata hivyo alisema  utaratibu wa kuwatoza fidia waharibifu wa barabara pindi ajili inapotokea ni pamoja na  kukamata bima zao ikiwa ni harakati za kutokomeza ajali zisizo za lazima.

Naye Meneja wa wakala wa barabara wa mkoa wa Morogoro (Tanroads) Charles Madinda alisema kumekuwa na uzembe kwa baadhi ya madereva hasa nyakati za usiku na husababisha ajali nyingi na wakati mwingine ajali hizo huwa ni za uzembe ikiwemo mwendo kasi.

Alisema sheria ya mwaka 2007/ 2009 kifungu cha 13 ya kulipa fidia endapo ajali itatokea na kuharibu barabara na alama zilizowekwa inafuatwa bila ya kumtazama ni mtu wa nafasi gani katika nchi kwani gharama za ujenzi ni mkubwa hivyo ni lazima kuzingatia muda ulioweka kwa matumizi ya barabara hiyo.

“ Barabara hii ni lazima itunzwa kwa madereva na hata wananchi waishio jirani na eneo lililopita barabara ili iweze kudumu kwa miaka zaidi ya 20 kama ambavyo imekusudiwa na ni wajibu wa kila mmoja,” alisema.

Kwa upande wake Meneja wa wakala wa barabara mkaoni Iringa (Tanroads) Paul Lyakurwa alisema wakandarasi hao wamejenga barabara hiyo kwa fedha ambzo walitakiwa kuzitumia bila ya kupungua wala kuzidisha.

Alisema barabara ambayo wameitekeleza inaukubwa wa kilometa 150 ambayo ilikuwa na sehemu nne ambazo ni Iyovi – Ruaha Mbuyuni km 40, Ruaha Mbuyuni – Kitonga km 47, Ikokoto – Iringa km 61 na Iringa Mjini km 2 iliyojengwa kwa fedha za US$ 110 milion  / Euro 76.2 Milion.

Lyakurwa alisema kutokana na hali ya uwaminifu wao kwa kuzingatia muda na kiasi cha fedha za makubaliana wamelazimika kuwapa sehemu nyingine ya ujenzi wa barabara itokayo Iringa - Mafinga  yenye urefu wa km 68  ambayo inatarajiwa kuanza rasmi mapema Septemba 18, 2011 na kumalizika July 9, 2013 kwa Euro 38.5m (us$ 46.2m).

Mradi huo wa awali ulianza rasmi September 19, 2008 kwa makubalina ya miaka mitatu ambayo ni 18 Sept 2011 na imemalizika kwa kuzingatia makubalina hayo.

Mwisho.
0713 654945

"Tanga Fresh Ltd" yakumbwa na changamoto mbalimbai katika uzalishaji maziwa

Na Gustav Chahe, Tanga

Kiwanda cha uzalishashi maziwa “Tanga Fresh Limited” kilichopo Mkoani Tanga kinakabiliwa na changamoto ya upungufu wa zao la maziwa hali inayotokana na ukosefu wa malisho kwa ng’ombe hasa kipindi hiki cha kianzazi.

Akiongea na mwandishi wa habari hizi kiwandani hapo hivi karibuni, afisa habari wa kiwanda hicho Bw. Charles Tumaini ameeleza kuwa kwa sasa kiwanda hicho kinalazimika kujiendesha kwa hasara kutokana na kushindwa kufikia asilimia 100 ya uzalishaji kulingana na nguvu ya mitambo iliyopo.

“Kwa sasa uzalishaji ni asilimia 60 tu ambayo sawa na lita 50,000 tu kwa masaa 8, hatujafikia kiwango cha asilimia 100 ya uzalishaji kulingana na nguvu ya mitambo yetu; kwa sasa tunazalisha asilimia 60 tu ambayo sawa na lita 50,000 kwa muda wa masaa 8 kila siku” alisema Bw. Tumaini.

“Tunakabiliwa na changamoto mbalimbali ambazo zinatukwamisha kuzalisha maziwa kwa wingi ambazo miongoni mwake ni kukosa malisho, maji ya kutosha na kukosa chakula cha kutosha kwa wanyama wetu” alisema Bw. Tumaini.

Mbali na kiwanda kukosa uwezo wa kusambaza chakula kwa wafugaji wao, baadhi ya wafugaji wenyewe wamekuwa wakishawishwa na bei za mitaani na kuuza maziwa yao huko na kiwanda kukosa maziwa yakutosha.

“Baadhi ya wafugaji wamekuwa wakishawishwa na bei za mitaani na kuuza maziwa yao huko huku kiwanda kikiwa kikikosa maziwa ya kutosha” alisema.

Lita moja ya maziwa kiwandani hapo hununuliwa kwa shilingi 528 wakati mitaani watu hununu kwa shilingi 1,000 mara mbili ya bei ya kiwandani.

Licha ya wafugaji wengi kuuza maziwa yao mitaani, wengi wao hawana mafunzo ya ufugaji na kushindwa kuzalisha maziwa yenye kiwango na kuiomba serikali kutoa mafunzo kwa wafugaji kupitia maofisa ugani waliopo pamoja na kuongeza idadi yao ili kuweza kuboresha ufuji.

“Wafugaji wengi wanakosa mafunzo na kushindwa kuzalisha maziwa yenye kiwango. Hivyo, tunaiomba serikali katika kilimo kwanza wawafikirie wafugaji ili nao wapewe kipaumbele hasa katika kuwapa mafunzo. Pia maofisa ugani waendelezwe na wapewe mafunzo ya kutosha ili waweze kuwahudumia wafugaji na kuboresha ufugaji wao” alisema.

Serikali imeombwa kuingilia ili kuwepo na mpango endelevu wa kupata maziwa mazuri yakutosha kwa ajili ya uzalishaji kiwandani hapo ikiwa  ni pamoja na kuweka mpango endelevu wa uthibiti wa magonja ya mifugo.

“Tunaiomba hata serikali iingilie ili tuweze kupata maziwa mazuri; wakati mwingine inatokana na kutokuwepo mpango maalumu wa uthibiti wa magonjwa ya wanyama. Hivyo, tunaomba uwepo mpango endelevu wa uthibiti wa magonjwa hayo ili uzalishaji wa maziwa uweze kuongezeka kila siku vinginevyo tutapoteza uzalishaji wetu na kipato” alisema.

Bw. Tumaini amewaomba wafugaji kutokukata tama katika kipindi hiki na kuendelea kupeleka maziwa kiwandani hapo bila kujali changamoto zinazojitokeza.

MWISHO