ASKARI POLISI AJIUA KWA KUJIPGA RISASI

Na Friday Simbaya, Iringa
ASKARI polisi amefariki dunia baada ya kujipiga risasi mbili chini ya kidevu, kifo kinachosadikiwa kuwa kinahusiana na wivu wa kimapenzi baina yake na askari mwingine. Kamanda wa polisi mkoa wa Iringa, Evarist Mangalla alisema askari huyo alijipiga na kufa papo hapo Julai 8, mwaka huu saa 3:00 usiku katika eneo la makazi ya mkuu wa mkoa wa Iringa eneo la Gangilonga, manispaa ya Iringa. Alimataja askari huyo kuwa ni G13 Mashauri (24) ambaye kabla ya kujiua alikuwa kwenye lindo eneo la benki ya CRDB ambako aliingia lindoni saa 12:00 jioni Julai 8, mwaka huu na kutoka saa 1:30 usiku kuelekea nyumbani kwa askari wa kike. Akielezea tukio hilo Mangalla alisema inadaiwa kuwa zamani Mashauri na Zahara walikuwa na uhusiano wa kimapenzi ambao hata hivyo waliachana kutokana na kutokuwepo na maelewano mazuri baina yao. Alisema baada ya kuachana kila mmoja aliendelea na mambo yake na hadi siku ya tukio hilo ambapo Mashauri alikuwa akifuatilia nyendo za askari huyo aliyekuwa na mahusiana ya kimapenzi awali. Mangalla alisema askari huyo aliondoka kwenye lindo lake na kuelekea eneo la Mafifi, Kihesa nyumbani kwa askari wa kike (WP 7137) aitwae Zahara ambako alikwenda baada ya kufika alibisha hodi na kufunguliwa mlango. “Baada ya kufunguliwa alimkuta Zahara amekaa na kijana mmoja aitwae Sunday Tumaini mfanyakazi wa Bayport akawatishia, ndipo askari wa kike alipiga kelele kuomba msaada, askari mwingine aliyekuwa amepanga kwenye nyumba hiyo alitoka na kusaidia”alisema kamanda huyo. Alisema askari aliyekuja kumsaidia Zahara, alimnyang’anya silaha aliyekuwa nayo Mashauri na baada ya kunyang’anywa aliondoka eneo hilo na kwenda kwenye lindo jingine eneo la Gangilonga kwenye Rest House ya Polisi ambako aliwakuta askari wengine ambao alianza kuzungumza nao. Alisema baada ya kuzungumza nao ghafla alimnyang’anya silaha askari mwenzake na kuondoka nayo kwenda kwenye eneo alilojiulia kwa kujipiga risasi mbili chini ya kidevu. Hata hivyo Mangalla alisema kuwa taarifa za awali za kujiua kwa askari huyo zinaonyesha alijiua kutokana na wivu wa kimapenzi lakini polisi wanaendelea na uchunguzi zaidi wa tukio hilo.