MANISPAA YA IRINGA YAFUTA VIJIJI SABA

 Mkurugenzi wa Manispaa ya Iringa, Theresia Mahongo (kulia) akiongea na waandishi wa habari kuhusu kuhuisha rejesta ya wakazi katika mitaa leo ofisini kwake. (PICHA NA FRIDAY SIMBAYA)

Na Friday Simbaya, Iringa

Manispaa ya Iringa kupitia waziri mwenye dhamana na serikali za mitaa imeridhia kufutwa kwa vijiji na kubakiwa na mitaa, hivyo Manispaa itakuwa na mitaa 192 kwa ongezeko la mitaa 43 (mitaa ya zamani 149).

Akiongea na waandishi wa habari leo  ofisini kwake Mkurugenzi wa Manispaa ya Iringa, Theresia Mahongo alisema kuwa mitaa 14 iliyotokana na maombi ya kugawana mitaa iliyoonekana kuwa na eneo kubwa na mitaa 29 iliyotokana na vitongoji kuitwa mitaa kutokana na vijiji kufutwa.

Aidha, alivitaja vijiji saba (7) vilivyofutwa kuwa ni Igumbulo, Nduli, Kigonzile, Mgongo na Itamba. Katika tangazo la serikali namba 300 la tarehe 22.08.2012 limeelezea maeneo ya utawala katika mamlaka za serikali za mitaa mwaka 2014. 

Kwa kuzingatia tangazo hilo Halmashauri ya Manispaa ya Iringa imekubaliwa kuwa na kata 18, kata mpya zikiwa ni kata ya Igumbulo inayotokana na kugawanywa Kata ya Ruaha na Kata ya Mkimbizi ambayo imetokana na kugawanywa Kata ya Mtwivila.

Kuhusu kuhuisha rejesta ya wakazi katika mitaa mkurugenzi huyo aliwataka wananchi wote wa Manispaa ya Iringa wajitokeze kujiandikisha katika rejesta ya wakazi katika mitaa husika.

Alisema kuwa daftari la wakazi la mtaa ni kumbukumbu ambayo inataarifa zote muhimu za wakazi wa mtaa na vitongoji wa eneo husika. Taarifa hizo ni kama jina la mkazi, umri, mtaa anaoishi, idadi ya watoto kama wapo n.k.

“Rejesta ta wakazi ilianzishwa chini ya sheria ya serikali za mitaa ya mwaka 1982 ambapo inataka wakazi wote wawe wameandikishwa ikiwa umehamia, umehama au mtoto amezaliwa laizama taarifa ziwepo kwenye daftari la wakazi la mtaa,” alifafanua Mahongo.

Alisema umuhumu wa kuhuisha taarifa katika rejesta za wakazi pamoja na mambo mengine itasaidia kufahamu idadi ya wakazi katika kila mtaa, na itasaidia pia katika kuandaa mipango ya manispaa kwa kufahamu idadi ya wakazi ulionao na mahitaji yao katika mipango ya maendeleo.

“wanatakiwa kusimamia zoezi hili kwenye kata zetu ni watendaji wa mitaa na wa wenyeviti wa mitaa, kwani hawa ndio wanafahamu watu wake kwenye mtaa husika na ndio wanatambulika katika mfumo wa serikali kwenye ngazi ya mtaa,” alielezea.