WILAYANI MUFINDI KUTEKELEZA MRADI WA VIAZI LISHE

Halmashauri ya Wilaya ya Mufindi  mkoani Iringa ni miongoni mwa  wilaya saba nchini, zilizochaguliwa na shirika la kimataifa lianaloshughulikia mazao ya viazi (CIP)  kutekeleza mradi  wa uzalishaji wa viazi lishe vyenye asilimia kubwa ya vitamini “A” ukilinganisha na  aina nyingine ya vyakula kama Mboga, Matunda na Mizizi.

Kauli hiyo imetolewa Jana na Ofisa habari na Mawasiliano wa Halmashauri ya Wilaya ya Mufindi. Ndimmyake Mwakapiso, wakati akizungumza na Nipashe  ofisini kwake.

Alisema kuwa viazi lishe hivyo ni aina ya viazi vitamu vyenye rangi ya chungwa vikiwa na asilimia 90 ya vitamini “A” vinavyohitajika katika mwili wa binadamu ili kuwezesha kuwa na uwezo mzuri wa kuona, kujenga ubongo wa watoto chini ya miaka mitano pamoja na kuimarisha afya ya wajawazito.

Alisema, mradi huo umeanza kutekelezwa katika vikundi vya wakulima kwa kuotesha mbegu kwenye maeneo yenye miundombinu ya umwagiliaji yaliyopo katika viijiji vya Igomaa na Lugolofu pamoja bustani ambazo hutambulika kwa jina la vinyungu kwa wakazi wa wilaya hiyo zilizopo kwenye vijiji vya Lugema, Mabaoni na Makungu.

Pia, aliongeza kuwa mbegu zitakazozalishwa zitagawiwa kwenye vijiji 18 ambayo vimechaguliwa kuanza kutekeleza mradi huo mara baada ya msimu wa mvua kuanza.

 “Vijiji vitakavyo pata mbegu hizo ni Makungu, Mabaoni, Lugema, Lugolofu,  Iramba, Ikimilinzowo, Nyigo, Nyanyembe, Maguvani, Idetero, Mkangwe, Ikangawani na Idumulavani,  Igomaa, Utosi, Kibada, Ugenza na Ikweha”, alisema Mwakapiso.

Aidha, alisema viazi vikizalishwa kwa wingi na kuongezwa thamani ya zao hilo vitamwongezea mkulima kipato kwani, soko lake linapatikana kwa urahisi huku vikiwa na uwezo wa kuzindikwa kwa kutengeneza Kripsi, Mikate, Chapati, Biskuti, juisi na Unga wa lishe.

“Wakulima wataopata mbegu hizo, wazitumie vizuri kuweza kuzalisha zao viazi kwa wingi ili liweze kujikwamua kiuchumi na kuondokana na umasikini”, alisema.

Mbali na Wilaya ya Mufindi kuchaguliwa kutekeleza Mradi huo, Wilaya nyingine zinazotekeleza Mradi huo, ni pamoja na Iringa, Ulanga, Mbozi, Chunya, Wanging’ombe na Gairo.