MKUNGA WA KUJITOLEA AMWAGA VIFAA TIBA HOSPITALI YA FRELIMO

Na Friday Simbaya, Iringa 

Mkunga wa kujitolea kutoka Ujerumani ametoa msaada wa vifaa mbalimbali vya tiba katika hospitali ya wilaya ya Frelimo iliopo katika Manispaa ya Iringa, mkoani Iringa. 

Mkunga wa kujitolea, Cornelia Block kwa kushirikiana na taasis ya African foundation for local and international internship (AFLII) ametoa vifaa tiba mbalimbali katika kitengo cha afya ya mama na mtoto, ikiwa ni uzinduzi wa program ya kuchangia vifaa tiba katika hospitali hiyo. 

Alisema kuwa katika awamu ya kwanza ya program ya kuchangia vifaa tiba ametoa vifaa tiba vyenye thamani ya shilingi milioni tano (5m/-) kwa kushirikiana na shirika la Rainbow Garden Village (RGV) la Ujerumani. 

Block alisema kuwa program hiyo pia itaendesha mafunzo maalum kwa wakunga juu ya mbinu za kisasa za kutoa huduma za afya ya mama na mtoto. 

Alisema kuwa jitihada za kuchangia vifaa tiba zinaendelea ikiwa ni pamoja na fedha kutoka kwa washirika wake ili kupata vifaa tiba zaidi ikiwemo mashine ya ultrasound. 

Hospitali ya Frelimo inakabiliwa na changamoto mbalimbali kama vile jengo la vipimo na uchunguzi, wodi ya kulazwa wagonjwa, wodi ya watoto, wodi ya wagonjwa wa magonjwa ya kuambukiza, jengo la kutakasisha vifaa, jengo la kufulia nguo pamoja na vifaa tiba. 

Naye Mratibu Mkazi wa Taasis ya AFLII Foundation Tanzania, Shedrack Mukuta alisema kuwa taasisi hiyo inaratibu na kuendesha zoezi la kupokea wataalam na wanavyuo wakujitolea wa ndani na nje kwa kuwatafutia nafasi katika vituo mbalmabli vya seriklai na sekta binafsi. 

Alisema kuwa madhumuni makuu ya kuratibu kazi hizo kujitolea ni kusaidiana na serikali na wadau mbalimbali wa maendeleo katika kuboresha huduma za kijamii zikiweo za afya, mazingira, elimu, utalii na uwekezaji kiuchumi. 

Mukuta alifafanua kuwa taasisi hiyo kwa kushirikiana na wadau mbalimbali wa maendeleo katika Mkoa wa Iringa wameweza kupokea na kuwatafutia nafasi za kujitolea bila malipo wataalamu na wanafunzi 47 katika vituo mbalimbali vya serikali pamoja na binfasi. 

Alisema kuwa taasisi hiyo ilisajiliwa mwaka 2016 na kuanza kazi mwaka 2017 katika mikoa ya Mtwara, Zanzibar, Arusha na Iringa. 

Alisema kuwa AFLII Foundation kwa mkoa wa Iringa inafanya kazi na wadau kama vile halmashauri ya Manispaa ya Iringa, Chuo Kikuu cha Iringa, Kanisa la KKKT Dayosisi ya Iringa, Kanisa la Angilikani Dayosisi ya Ruaha, Kibebe Farm na idara za serikali na binafsi. 

Pamoja na jitihada na mafanikio hayo taasisi hiyo bado inakabiliwa na changamoto kadhaa ikiwemo mabadiliko katika taratibu na miongozo ya uhamiaji jambo linaloleta usumbufu mkubwa hasa wataalam wanapoingia nchini. 

Kwa upanda wao, mbunge wa viti maalum Mkoa wa Iringa Ritta Kabati (CCM) ambaye alikuwa mgeni rasmi katika hafla ya kukabidhi vifaa vya tiba na Mkuu wa Mkoa wa Iringa Amina Masenza walimpongeza mkunga wakujitolea Cornelia Block kwa msaada huo. 

Kwa pamoja waliwataka wadau wengine wa maendeleo kujitokeza katika kutatua changamoto katika hospitali ya Frelimo pamoja hospitali zingine mkoani Iringa. 

Walisema kuwa hospitali hiyo inkabiliwa na changamoto ya miundombinu na vifaa tiba ambavyo vimekuwa vikikamisha shughuli za kutoa huduma bora kwa wananchi. 

Hospitali ya Frelimo inahitaji vifaa tiba kama vile biochemistry machine, hematology machine Viral load analyzer, Ultrasound machine na X-ray machine kwa mujibu wa Mganaga Mfawidhi wa Hospitali Dr Pilila Zambi.