PADRE WA ABASIA YA PERAMHIO AFARIKI DUNIA

HAYATI DIETRAM HOFMANN OSB

Na Friday Simbaya, Songea

ABASIA ya Peramiho ya Mtakatifu Benedkto imepata pingo baada ya aliyekuwa Padri Dietram (Alfred) Hofmann OSB kufariki dunia jana mnamo saa 5.45 asubuhi.

Kwa mujibu wa Abate Anastasius Reizer OSB alisema kuwa marehemu Padri Hofmann alifariki dunia katika nyumba ya kutunzia wazee watawa (infirmary) hapa Peramiho akiwa na umri wa miaka 83.

Marehemu alizaliwa tarehe 13 Oktoba 1929 huko Weisbrunn katika Jimbo la Würzburg / Ujerumani katika familia ya wakulima wadogo akiwa mmoja kati ya watoto 9. Kaka yake, Hayati Pd. Ludger, alimtangulia kuingia Abasia ya Münsterschwarzach. Baada ya kuhitimu masomo yake ya sekondari kijana Alfred naye alijiunga na Abasia ya Münsterschwarzach na kupewa jina Dietram alipoingia unovisi mwaka 1948. Tar. 8 Septemba 1949 alifunga nadhiri zake za kwanza.

Baada ya kusoma falsafa katika Chuo Kikuu cha Abasia ya Mt. Ottilien alitumwa Roma kuendelea na masomo ya teolojia katika Chuo cha Mt. Anselmo. Tar. 4 Julai 1954 alipata daraja la upadre huko Münsterschwarzach. Baadaye aliendelea na masomo ya Biblia huko St. Anselmo na katika Chuo cha Biblicum akajipatia shahada ya juu (udaktari) katika fani ya Maandiko Matakatifu.

Mwaka 1959 P. Dietram aliteuliwa kwa ajili ya kazi ya umisionari katika Abasia Peramiho. Baada ya kipindi cha kujifunza lugha ya kiingereza huko London aliwasili hapa Peramiho tarehe 23 Februari 1960. Alitumwa Parokia Matimira alikohudumia kwa mwaka mmoja wakati anajifunza lugha ya Kiswahili. Kisha alitumwa katika Chuo cha Makatekista Mgazini na kufundisha huko mpaka 1965. Hapo ndipo alipoanza huduma yake kwa muda wa miaka 25 katika Seminari Kuu hapa Peramiho (1965-1990). Muda wote huu alikuwa mwalimu hodari wa Maandiko Matakatifu /Agano la Kale kwa vizazi vya waseminari. Pia alifundisha masomo mengine kama vile katekesi na namna ya kuhubiri. Hayati Askofu Mkuu J.J. Komba mara nyingi alitumia utaalamu wa P. Dietram katika kuandaa barua zake za kichungaji. Aidha, alitumikia katika kamati mbalimbali za jimbo.

Mwaka 1990 P. Dietram alitumwa na wakubwa wake Uwemba kwa ajili ya kuwasaidia ndugu wa huko kama procurator(mhasibu). Kwa muda fulani alisaidia pia katika nyumba ya Wabenediktini huko Kurasini / Dar es Salaam. Muda wote alipokuwa mwalimu au kufanya kazi ya procura, marehemu alisaidia pia kazi za uchungaji akiwa mhubiri hodari aliyefundisha Neno la Mungu kwa ufasaha.

P. Dietram alikuwa mpenda amani, mpatanishi. Daima alisimama kwenye ukweli. Pia, alikuwa makini sana kusali Sala ya Kanisa na kushika kanuni mbalimbali za liturjia.