JKT MLALE YAIBAMIZA MAJIMAJI FC MAGOLI 2-0

Mwenyekiti wa Timu ya Majimaji Hamphrey Milanzi (kushoto) na Kocha ya timu  hiyo Peter Mhina wakifuatilia mchezo kwa umakini kati  ya timu yao na JKT Mlale  uliofanyika katika Uwanja wa Majimaji mjini Songea, mkoani Ruvuma leo, ambapo JKT Mlale ilishinda magoli 2-0. (Picha na Friday Simbaya)

Na Friday Simbaya, Songea

 JKT  MLALE imeiadhibu timu ya Majimaji ya Songea mjini bila huruma kwa kuibamiza magoli 2-0 katika michuano ya Ligi Daraja la Kwanza (FDL) inayoshirikisha timu 24 zilizogawanywa katika makundi matatu msimu huu, iliyoanza kutimua vumbi Septemba 14, mwaka huu.

Mechi ya ufunguzi ya timu hizo mbili zilifanyika katika Uwanja wa Majimaji mjini Songea mkoani Ruvuma, huku wenyeji Majimaji FC wamechapwa magoli 2-0 na timu ya JKT Mlale.

Aidha, JKT Mlale ilipata goli la kwanza kupitia mshambuliaji wake Edward Songo mnamo dakika 19 katika kipindi cha kwanza na goli la pili lilifungwa na Ally Bilali dakika ya 21.

 Kila timu itakayoongoza kundi lake katika ligi itakayochezwa kwa mikondo miwili (nyumbani na ugenini) ndiyo itakayopanda daraja kucheza Ligi Kuu ya Tanzania Bara msimu wa 2014/2015.

 Kwa mujibu wa taarifa ya Shirikisho la Soka Tanzania (TFF), mechi za ufunguzi kwa kundi A zitakuwa kati ya Tessema dhidi ya Green Warriors (Uwanja wa Karume, Dar es Salaam) wakati Septemba 15, mwaka huu ni Transit Camp itakayocheza na Polisi Dar (Uwanja wa Mabatini, Pwani).

Mechi nyingine siku hiyo ni Ndanda itakayoivaa Friends Rangers (Uwanja wa Nangwanda, Mtwara) wakati Villa Squad itaikabili African Lyon itachezwa Uwanja wa Karume, Dar es Salaam.

 Kundi B ni Burkina Faso itacheza na Polisi Moro (Uwanja wa Jamhuri, Morogoro), Mkamba Rangers itaivaa Lipuli (Uwanja wa CCM Mkamba, Morogoro), Majimaji itakuwa mwenyeji wa Mlale JKT (Uwanja wa Majimaji) wakati Septemba 15, Kimondo SC itacheza na Kurugenzi (Uwanja wa Sokoine, Mbeya).

 Mechi za ufunguzi kundi C ni Polisi Mara dhidi ya Polisi Dodoma (Uwanja wa Karume, Musoma), Kanembwa JKT itacheza na Polisi Tabora (Uwanja wa Lake Tanganyika, Kigoma), Stand United itaivaa Mwadui (Uwanja wa Kambarage, Shinyanga), na Pamba dhidi ya wenzao Toto Africans (Uwanja wa CCM Kirumba, Mwanza).

 Taarifa ya TFF ilisema kuwa mzunguko wa kwanza wa ligi hiyo utamalizika Oktoba 26, mwaka huu wakati wa pili utamalizika Machi 22, mwakani.