Wafanyakazi wa Barabara Njia panda Kalenga walia hali ngumu ya maisha…!

 

Mlinzi wa kampuni hiyo (wa pili kutoka kulia) ambaye hakutaka kutaja jina lake akiongea na waandishi hivi karibuni ambapo alisema kuwa kampuni hiyo ina jumla ya walinzi watatu, lakini wana miezi miwili na siku 20 bila malipo.

 Mpishi Mkuu wa Kampuni ya ujenzi ya Canopies International, Agape Mgongola akiendelea na kazi yakuwapikia wafanyakazi wa kampuni hiyo bila malipo kwa miezi minne sasa. 

Na MARTHIAS KANALI, Iringa

Wakazi wa Kitongoji cha Msosa mkoani Iringa wameilalamikia kampuni ya Canopies International (T) Ltd kutoka Mwananyamala jijini Dar es Salaam ambayo inajishugulisha na ujenzi wa barabara kutoka njia panda ya Kalenga kuelekea Tosamaganga kutokana na kushindwa kuwalipa fedha zao takribani miezi minne sasa.

Wakizungumza kwa nyakati tofauti na THE SCOOP kijijini hapo wafanyakazi hao wamesema kuwa familia zao zimekuwa hazina msingi mzuri wa kimaisha kutokana na malimbikizo ya mshahara ambayo yawezekana wakalipwa ama wasilipwe kabisa, kwani mradi huo upo katika hatua za mwisho za ujenzi wa barabara hiyo.

Kwa upande wake mpishi mkuu Agape Mgongola ambaye ana miaka miwili tangu ameanza kufanya kazi na Kampuni hiyo tangu ilipoanza ujenzi wa barabara inayokwenda Kalenga hajawahi kupata usumbufu kama huu ambao anaupata kwa sasa. Agape alisema kuwa ni miezi miwili na wiki moja hajapatiwa malipo ya aina yoyote jambo ambalo ni la kustaabisha na kuathiri familia yake kiuchumi.

Aliongeza kuwa katika mkataba wake alipaswa kulipwa shilingi 35,000 kwa wiki, lakini hadi kufikia hivi sasa anadai jumla ya shilingi 315,000 kitendo ambacho kimekuwa tofauti na makubaliano ya malipo kabla ya kuanza kazi.

Akizungumzia adha wanayoipata kutokana na kutolipwa, mlinzi wa kampuni hiyo ambaye hakutaka kutaja jina lake alisema kuwa kampuni hiyo ina jumla ya walinzi watatu, lakini wana miezi miwili na siku 20 bila malipo, hivyo kila mmoja anadai laki nne. "Sisi walinzi wa kampuni makubaliano yetu yalikuwa ni kwa mwezi, lakini hii ni miezi miwili na siku 20 sasa hakuna malipo hivi unadhani tunajikomboaje katika wimbi la umasikini kwa unyanyasaji na unyama tunaofanyiwa" alisema mlinzi huyo.

Mlinzi huyo alisema kuwa mwajiri wao amekuwa na dharau kwa watumishi hao, lakini hawana namna ya kujikwamua katika unyanyasaji, hivyo amaiomba serikali kuingilia kati na kutataua adha hiyo.

Wafanyakazi wa kampuni wanatoka sehemu tofauti tofauti hapa Tanzania ambapo wengine ni kutoka Dar es Salaam, Songea, Makambako na wengine wanatoka Iringa mjini. Wafanyakazi hao walisema kuwa unyanyasaji wanaofanyiwa na kampuni hiyo kuanzia kwenye malipo hadi wanapolala ni utumwa, kwani chumba kimoja wanalala watu zaidi ya 10.

THE SCOOP ilimtafuta Msimamizi wa malipo Ismail Joseph, ambapo majibu aliyatoa hayakuwa ya kuridhisha kwani alisema kuwa baadhi ya wafanyakazi hawatambui na wala hawezi kuwalipa.

Hata hivyo leo asubuhi nilipokea simu kutoka kwa mtu aliyejitambulisha kama kiongozi wa Mradi huo wa barabara, ambaye alikiri kutowalipa wafanyakazi hao kama ambavyo wanalalamika.

Maungumzo kwa njia ya simu kati ya mwandishi na kiongozi huyo yalikuwa hivi; Mwandishi: Habari yako? Kiongozi: Nzuri natumai naongea na Mwandishi uliyefika jana ukafanya mahojiano na wafanyakazi wangu. Mwandishi: Ni kweli haujakosea, nikusaidie nini? Kiongozi: Taarifa uliyoipata jana kuhusu malipo ya wale watu ni kweli lakini hatujawalipa na hatutegemei kuwalipa hadi pale TANROADS. Kwa upande wake Meneja wa TANROADS Mkoa wa Iringa, Paulo Lyakurwa alisema kuwa kutolipwa ama kulipwa wafanyakazi hao sio jukumu la TANROADS, bali ni jukumu la kampuni hiyo. "Sisi tuliingia mkataba na Kampuni ya Canopies kwa hiyo, kampuni hiyo inapofanya kazi na vibarua ama wafanyakazi hawatuhusu sisi, tunapaswa kuhakikisha serikali imemlipa mkandarasi malipo yake kwa wakati japo kuna wakati malipo yao huchelewa, lakini sio sababu ya yeye kushindwa kuwalipa" alisema Lyakurwa.

Hata hivyo alisema kuwa atahakikisha anasimamia swala la malipo ili wafanyakazi hao waweze kulipwa kwa wakati.