MAJALIWA MGENI RASMI SIKU YA WALIMU DUNIANI MANISPAA YA IRINGA

Na Friday Simbaya, Iringa

Katibu wa Chama cha Walimu Tanzania (CWT) Wilaya Iringa Manispaa, Fortunatafatuma Njalale amesema mgeni rasmi katika kilele cha siku ya waalimu duniani kiwilaya atakuwa Naibu Waziri, Wizara ya Elimu na Mafunzo ya Ufundi TAMISEMI, Kasimu Majaliwa (MB).

Alisema kuwa sherehe zinatanguliwa na juma la elimu siku ya walimu duniani Wilaya ya Iringa Manispaa kuanzia tarehe 29/09/2014 hadi 01/10/2014 ambapo itakuwa ni siku ya kilele kiwilaya katika Uwanja wa Samora, ili kujiandaa na sherehe hizo zitakazofanyika kitaifa mkoani Bukoba tarehe 5 mwezi Oktoba mwaka huu.

“Sisi wilaya na mikoa huwa tunafanya sherehe hizo siku ya walimu duniani kabla ya kilele kitaifa ili kuwapa na nafasi viongozi mbalimbali wa wilaya na mikoa kushiriki katika sherehe za kitaifa ukizingatia Bukoba ni mbali sana…,” alifafanua.

 Kila tarehe 5 mwezi wa kumi kila mwaka, huwa ni siku ya Walimu Duniani. Siku hii ya walimu duniani hutafakari walikotoka na changamoto wanazopata wakiwa kazini.

Aidha, katibu huyo alisema kuwa katika juma hilo la sherehe za siku ya walimu duniani kiwalaya chama hicho kitafanya shughuli mbalimbali pamoja na kuwa na mkutano wa uzinduzi wa ndani, ambapo mgeni rasmi alitarajia kuwa rais wa CWT Taifa, Gratian Mkoba lakini mgeni rasmi huyo kwa bahati mbaya amepata hudhuru.

Aliongeza kuwa kutokana na mabadiliko ya ratiba hiyo wamepanga kukutana na kiongozi huyo wa kitaifa baada ya sherehe hizo kumalizika kwa ajili ya kuongea na walimu Manispaa ya Iringa.

Alisema kuwa shughuli zingine zitakazofanyika katika sherehe hizo ni pamoja na kuona watoto wagonjwa katika hospitali ya rufaa mkoa wa Iringa, usafi wa soko katika soko kuu Manispaa ya Iringa, mashindano ya michezo ya riadha, mashindano ya mpira wa pete na miguu timu za walimu na timu za nje na hatimaye kufanya maandamano kuanzia Manispaa ya Iringa hadi katika Uwanja wa Samora kwa ajili ya kilele cha sherehe hizo ki wilaya hapo tarehe 01/10/2014.

Hata hivyo katibu huyo alitoa wito kwa walimu wote wa Wilaya ya Manispaa ya Iringa kujitokeza kwa wingi ili waweze kuonyesha vipaji mbalimbali pamoja kuonyesha ubunifu wao katika masomo mbalimbali.

Kauli mbiu ya maandhimisho mwaka huu; wekeza katika elimu kwa ajili ya maendeleo.