NYALANDU: HAIWEZEKANI KILA MWANA MUFINDI KUVUNA MITI SAOHILL

Nyalandu katika mkutano wake na wananchi wa kijiji cha Igowole, Mufindi Kusini, mkoani Iringa

Alisistiza mengi

WAZIRI wa Maliasili na Utalii, Lazaro Nyalandu amesema haiwezekani kila mwananchi wa wilaya ya Mufindi mkoani Iringa anayeomba kuvuna miti katika msitu wa Taifa wa Saohill ulioko wilayani humo akapata kibali.

“Nitakuwa muongo nikitoa ahadi hiyo; lakini niwaahidi tu kwamba tutazidi kuboresha kanuni zinazotumika kutoa vibali kwa waombaji ili rasilimali hii inufaishe watu wengi zaidi,” alisema.

Aliyasema hayo juzi katika ziara yake aliyoifanya katika kijiji cha Igowole wilayani humo akiitikia wito wa mbunge wa Jimbo la Mufindi Kusini, Mendrad Kigola aliyemuomba waziri huyo kukutana na wananchi wa jimbo hilo ambao ni sehemu ya wadau wakubwa wa msitu huo.

Kwa kupitia risala yao iliyosomwa na Precious Nyalusi, wajasirimali wa jimbo hilo walimwambia waziri huyo katika mkutano wa hadhara uliofanyika kwenye uwanja wa kijiji hicho kwamba walitegemea msitu huo ungewanufaisha zaidi watu wa Mufindi tofauti na ilivyo sasa.

“Tulitegemea tungekuwa wanufaika wa kwanza wa malighafi hii kwa kuwa umependwa katika meneo yaliyoachwa kwa nia njema na wazazi wetu, cha kushangaza unanufaisha zaidi matajiri, wakubwa na kampuni hewa” alisema.

Awali Mbunge wa Jimbo la Mufindi Kusini alimueleza waziri huyo kwamba msitu huo ni sawa na mali ya wana Mufindi kwa kuwa wao ndio waliopanda na kuulinda hadi kufikia hatua ya kuvuna hivyo kuna kila sababu  asilimia 50 ya kila mgao unaotengwa kwa ajili ya uvunaji kila mwaka ikatolewa kwao.

“Mwaka jana asilimia 52 ya mago ulitolewa kwa wazawa huku asilimia 48 zikitolewa kwa wageni; Mwaka huu Mufindi Kusini tulichopata hakizidi asilimia tano,” alisema.

Kigola alisema; “sina matatizo na jinsi Mamlaka ya Misitu Tanzania ilivyotoa mgao kwa vijiji na baadhi ya wananchi, shida yangu iko kwenye mgao wa vikundi hasa vya wilaya ya Mufindi,” alisema.

Alisema wakati vikundi 12 vya jimbo la Mufindi Kusini ndivyo vilivyopata mgao, 36 vilivyobaki vimetoka katika jimbo la Mufindi Kaskazini linaloongozwa na Naibu Waziri na Utalii, Mahamudu Mgimwa.

Katika majibu yake Nyalandu aliwapongeza wananchi wa wilaya hiyo kwanza kwa kutoa maeneo yao yaliyopandwa masitu huo na pili kwa kuulinda msitu wenyewe.

Alisema ili kuwafanya watanzania wengi wanufaike na rasilimali hiyo, serikali iliamua kusitisha maamuzi yake ya kuuza miti katika misitu yake kwa njia ya mnada na kuendelea na mfumo wa sasa wa vibali.

“Zilikuwa ni busara za Rais jaka Kikwete, vinginevyo rasilimali hii ingekuwa inawanufaisha wenye uwezo mkubwa wa kifedha kwasababu katika mnada anayetoa zaidi ndiye anayeuziwa,” alisema.

Alisema kwa kupitia mfumo wa vibali, yapo baadhi ya maeneo yanahitajika kuboreshwa  ili kuwafanya watanzania wengi zaidi na wale wanaosaidia kulinda misitu wanufaike.

“Kama nilivyosema haitawezekana kila mwana Mufindi au wadau wote wanaoomba mgao wa kuvuna watapata kibali lakini tutakachofanya ni kuyakumbuka maeneo yote ambayo wananchi wanatusaidia kulinda misitu,” alisema.

Aliiagiza Mamlaka ya Misitu Tanzania (TFS) kuendelea kuboresha kanuni zinazotumika kutoa vibali kwa waombaji wakizangatia maslai mapana ya Taifa.

“TFS waangalie sehemu zote zinazotatanisha  katika mfumo wa mgao tunaotumia sasa, yaliyojitokeza yasipuuzwe, pitieni upya taratibu za utoaji wa vibali ili makundi yote yanufaike; wananchi, viwanda vidogo, vya kati na vikubwa, vikundi vijiji, taasisi na wadau wote  kwa kadri itakavyowezekana wakumbukwe lakini kwa kuzingatia kanuni, taratibu na sheria,” alisema. CHANZO: BONGOLEAKS