NYALUSI:MAANDAMANO YA CHADEMA IRINGA YAKO PALEPALE...!

Mwenyekti wa Chama cha Demokrasia na Maendeleo (Chadema) Jimbo la Iringa Mjini, Frank Nyalusi akihutubia mkutano wa hadhara katika Kata ya kitanzini leo.

Mkazi wa Kitanzani Claud Mahembe akiuliza swali la kutaka kupata ufafanuzi kweni bunge la katiba maalum halisitishwi kwa mwenyekiti wa Chadema Wilaya Iringa Frank Nyalusi wakati wa mkutano wa hadhara jioni leo.

Na Friday Simbaya, Iringa

CHAMA cha Demokrasia na Maendeleo (Chadema) Jimbo la Iringa Mjini limeshindwa kufanya maandamano ya amani kama ilivyotangazwa kwa kile kilichoelezwa na Mwenyekiti wake, Frank Nyalusi "tumepokea zuio kali kutoka jeshi la Polisi."

Akizungumza katika mkutano wadhara uliyofanyika Kata ya Kitanzaini mjinin Iringa, Nyalusi alisema wata fanya maandamano hayo Jumatatu wiki ijayo ikiwa ni kuitikia wito uliotangazwa na Mwenyekiti wao wa Taifa, Freeman Mbowe wa kufanya maandamano ya amani yasio na ukomo yenye lengo la kushinikiza kusitishwa kwa Bunge la Katiba.

Alisema pamoja na jeshi hilo kuwazuia kufanya maandamano jana hiyo hiyo waliruhusiwa kufanya mkutano wa hadhara uliofanyika mtaa wenye machinga wengi maarufu kama magari mabovu, Kitanzini.

Akieleza kushangazwa na maamuzi ya Polisi ya kuzuia maandamano yao, Nyalusi alisema maazimio yaliofikiwa katika mkutano huo nikufanya maandamano Jumatatu hata bila ya kibali cha polisi.

Wakati Chadema wakidai kudhibitiwa kufanya maandamano hayo, Kamanda wa Polisi wa Mkoa wa Iringa, Ramadhani Mungi alisema jeshi hilo halijapokea barua yoyote kutoka katika chama hicho inayoonesha wameomba kufanya maandamano hayo.

Akitoa ufafanuzi huo kwa njia ya simu, Mungi alisema "nchi hii kama zilivyo nchi nyingine inaendeshwa kwa sheria, taratibu na kanuni."

Alisema watanzania bila kujali wanatoka kundi gani ni lazima wafanye mambo wanayotaka kufanya kwa kuzingatia sheria vinginevyo mkono wa sheria utawafukuzia.

Alisema mji wa Iringa upo shwari na kwamba jeshi la Polisi limejipanga kikamilifu kukabiliana na hali yoyote ile itakayoonekana inataka kuhatarisha amani.

Aliwataka wakazi wa Iringa kuendelea na shughuli zao kama kawaida na pale watakahisi au kusikia kuna mtu au kikundi chochote cha watu kinataka kufanya jambo linaloweza kuhatarisha usalama wao na wa mali zao, watoe ushirikiano kwa kutoa taarifa Polisi.