MKOA wa Iringa kuandikisha jumla ya wapigakura 646,575 katika daftari la kudumu ya wapigakura

semina ya mafunzo ya maandalizi ya uboreshaji wa daftari la kudumu la wapigakura iliyohusisha mratibu wa uandishaji wa mkoa, afisa mwandishaji, maafisa waandishaji wasaidizi na maafisa uchaguzi wa halmashauri kwa Mkoa wa Iringa.

MKOA wa Iringa unatarajia kuandikisha jumla ya wapigakura 646,575 katika daftari la kudumu ya wapigakura kwa kutumia mfumo mpya ujulikanao kama Biometric Voters Registration (BVR) unatarajia kuanza mwishoni mwa mwezi huu, Nipashe imedhibitisha.

Hayo wamefahamika jana wakati wa semina ya mafunzo ya maandalizi ya uboreshaji wa daftari la kudumu la wapigakura iliyohusisha mratibu wa uandishaji wa mkoa, afisa mwandishaji, maafisa waandishaji wasaidizi na maafisa uchaguzi wa halmashauri kwa Mkoa wa Iringa.

Akitoa taarifa kwa waandishi wa habari leo/jana Katibu Tawala Msaidizi-Serikali za mitaa ambaye pia mratibu wa uchaguzi wa mkoa wa Iringa, Wilfred Myuyu alisema kuwa katika maoteo (projection) ya awali mkoa unatarajia kuandikisha wapigakura wapatao 646,575 pamoja na vituo vya uandishaji 1,192.

Alikitoa mchanganuo wa uandikishaji kwa kila halmashauri alisema kuwa Manispaa ya Iringa inatarajia kuandikisha wapigakura 79,086, Halmashauri ya Iringa (121,452), Halmashauri ya Mufindi (252,303), Mafinga mjini (74,043) na Kilolo (118,692).

Kwa upande wa vituo vya uandikishaji katika mabano Manispaa ya Iringa itakuwa na vituo (192), Kilolo (257), Mufindi DC (347), Mafinga TC (76) na Iringa DC (320).

Awali wakati akifungua semina ya mafunzo hayo, Mkuu wa Wilaya ya Iringa, Angelina Mabula kwa niaba ya Mkuu wa Mkoa wa Iringa, Amina Masenza alitoa wito kwa maafisa hao kuzingatia maelekezo yote yatakayotolewa na tume ili kuweza kufanya kazi vizuri wakati wa zoezi hilo.

“Napenda kusisitiza tena kwenu kwamba mkiwa maafisa waandishaji na maafisa wasaidizi mnatakiwa kuhakikisha kwamba watu wote wanaostahili kuandikishwa na watakaofika kujiandisha kwenye vituo wanandikishwa na kuhudumiwa kulingana na utaratibu uliowekwa ili majina yao yawepo katika daftari la kudumu la wapigakura,” alisema Masenza.

Aidha, katika utaratibu wa sasa, kama ilivyokuwa katika utaratibu wa zamani, wawakilishi wa vyama vya siasa wanataruhusiwa kuwepo katika vituo vya kuandikisha wapigakura.

“Jambo hili ni muhimu kwani linasaidia kudhihihirisha uwazi katika zoezi zima. Wajibu wa wawakilishi wa vyama vya siasa kama ilivyoelezwa ni kuangalia kwamba sheria, kanuni, na taratibu zilizowekwa na tume (NEC) zinazingatiwa katika uandikishaji,” alisema mkuu huyo.

Hata hivyo, mkuu wa mkoa huyo alitoa wito kwa viongozi wa dini kuhamasisha waumini na watu wote hususan raia wote walio na sifa za kujiandikisha kupiga kura ili wajitokeze kwa wingi kwa ajili ya kuandikishwa.

Aliongeza kuwa watakaojiandikishwa ni wananchi wote waliowahi kuandikisha hapo awali, waliotimiza umri wa miaka 18 na kuendelea na wote ambao kwa sababu mbalimbali hawakuwahi kuandikishwa ikiwa ni pamoja na wale watakaotimiza umri wa miaka 18 ifikapo siku ya uchaguzi, yaani Oktoba 2015.

BVR ni kifaa cha kisasa ambacho huandikisha kwa kutumia kompyuta na kuchukua alama za vidole, saini na upigaji picha kwa ubora wa hali ya juu ili kuondoa uwezekano wa wapiga kura kujiandikisha zaidi ya mara moja.