TASAF WATAKIWA KUFANYA KAZI KWA UWAZI NA UWAJIBIKAJI

Picha na Maktaba

Wasimamiaji wa mpango wa kunusuru kaya masikini mkoani Iringa wametakiwa kuimarisha uwazi, uwajibikaji na kuruhusu makundi tofauti kushiriki kwa kutumia mfumo madhubuti wa wanufaika.

Kauli hiyo imetolewa na Mkuu wa mkoa wa Iringa, Amina Masenza katika hotuba yake ya ufunguzi wa warsha ya kujenga uelewa wa wadau kuhusu mpango wa kunusuru kaya masikini TASAF awamu ya III iliyofanyika ukumbi wa mikutano wa Valentine mjini Iringa na kusomwa na Mkuu wa Wilaya ya Kilolo, Seleman Mzee.

Masenza alisema “ni mategemeo yangu kuwa utekelezaji wa mpango huu wa kunusuru kaya masikini utaimarisha uwazi, uwajibikaji na kutoa fursa kwa makundi mbalimbali kushiriki kwa kutumia mfumo madhubuti wa kubaini walengwa katika vijiji na mitaa yetu”. 

Alisema muundo wa awamu ya tatu, umezingatia vema changamoto ambazo zilijitokeza katika utekelezaji wa awamu ya pili. 

Alisema kwa maana hiyo usimamizi na ufuatiliaji umeimarishwa katika ngazi ya mkoa, halmashauri na kata kwa kuhusisha watumishi zaidi kufuatilia shughuli za mfumo wa maendeleo ya jamii. 

“Napenda kusisitiza azma ya serikali ya kuhakikisha kuwa wananchi wanapata maendeleo na ndiyo lengo la kuanzisha mpango huu ambao utatekelezwa katika vijiji na mitaa yetu ili kuondoa umasikini kwa manufaa ya jamii yetu” alisisitiza Masenza.

Akiongelea utekelezaji wa mpango huo, mkuu wa mkoa alisema kuwa utekelezaji wa mpango huo unatarajiwa kuwafikia wastani wa walengwa 6,500,000 katika kaya masikini na zilizo katika mazingira hatarishi 1,000,000 za Tanzania. 

Alisema viongozi wanao wajibu wa kusimamia vizuri mpango huo ili kuhakikisha kaya zilizotambuliwa na kuandikishwa kwenye orodha ya kaya masikini, zinafaidika kwa kushiriki katika program ya uhawilishaji fedha, program ya mradi ya ujenzi ambayo itatoa fursa za ajira za muda katika kipindi cha hari, program ya kujenga uwezo wa kujikinu na kuongeza kipato na kujengewa uwezo.

Mwakilishi wa mkurugenzi mkuu wa TASAF, Richard Njalika alisema kuwa mpango wa kunusuru kaya masikini umepangwa kutekelezwa kwa awamu ili kufikia jumla ya halmashauri 169 za Tanzania. 

Awamu za utekelezaji mpango huu zimelengwa kujenga uwezo kwa wawezeshaji wa kutosha na kujenga mifumo pamoja na kuboresha utekelezaji katika kila awamu. Alisema kuwa awamu hii imepangwa kutekelezwa kwa kipindi cha miaka 10 katika awamu mbili za miaka mitano mitano. 

Alisema kuwa utekelezaji wa mpango unahitaji uwekezaji mkubwa kwenye mifumo na kujenga uwezo katika ngazi zote za utekelezaji.

Akiongelea sehemu za mpango huo, mwakilishi wa mkurugenzi mkuu wa TASAF alizitaja sehemu hizo kuwa ni kujenga uwezo katika ngazi zote za utekelezaji na kujenga na kuboresha miundombinu inayolenga sekta za elimu, afya na maji. 

Seheumu nyingine ni uhawilishaji fedha, ambapo unatoa ruzuku kwa kaya masikini sana zinazotambuliwa kwa mchakato unaoshirikisha jamii. 

Kuongeza kipato kwa kaya masikini kupitia uwekaji akiba na shughuli za kiuchumi ili kuboresha maisha. Eneo lingine ni kutoa ajira kwa kaya masikini zenye watu wenye uwezo wa kufanya kazi wakati wa hari.